گرۋزيادان قازاقستانعا سينتەتيكالىق ەسىرتكىنى اسا ءىرى مولشەردە ساتتى جانە قىلمىستىق كىرىستەردى زاڭداستىردى دەپ كۇدىكتەلگەن ازامات جەتكىزىلدى، دەپ حابارلايدى Infohub.kz.
باس پروكۋراتۋرانىڭ مالىمەتىنشە، قاداعالاۋ ورگانىنىڭ قىزمەتكەرلەرى ىشكى ىستەر مينيسترلىگىنىڭ ينتەرپولىمەن بىرلەسىپ، قازاقستاننىڭ گرۋزياداعى ەلشىلىگىنىڭ كومەگىمەن ۇيىمداسقان قىلمىستىق توپتىڭ مۇشەسى بولعان قازاقستاندىقتى ەكستراديسيالادى. بۇل توپ پسيحوتروپتىق زاتتاردىڭ زاڭسىز اينالىمىمەن جانە اقشانى جىلىستاتۋمەن اينالىسقان.
تەرگەۋ انىقتاعانداي، كۇدىكتى الماتى وبلىسىنىڭ اۋماعىندا ەسىرتكى ءوندىرىسىن اسا ءىرى مولشەردە ۇيىمداستىرعان. دايىندالعان پسيحوتروپتىق زاتتاردىڭ انالوگتارى كەيىن «زاكلادكالار» ارقىلى تاراتىلعان.
قىلمىستىق توپتان 10 كەلىگە جۋىق مەفەدرون پسيحوتروپتىق زاتى تاركىلەندى. 1،8 ميلليارد تەڭگەدەن اساتىن زاڭسىز كىرىستى قىلمىسكەرلەر ءارتۇرلى قارجىلىق وپەراسيالار، سونىڭ ىشىندە كريپتوايىرباستاۋ پۋنكتتەرى ارقىلى زاڭداستىرعان. سونىمەن قاتار، ولار 600 ميلليون تەڭگەدەن استام سوماعا جىلجىمايتىن م ۇلىك، بيزنەس وبەكتىلەرى جانە كولىك قۇرالدارىن ساتىپ العان. بۇل اكتيۆتەرگە كەيىن مەملەكەت كىرىسىنە اينالدىرۋ ماقساتىندا تىيىم سالىنعان.
باس پروكۋراتۋرادا قىلمىستىق توپتىڭ ءبىر بولىگى سوتقا بەرىلگەنىن جانە ولاردىڭ ىستەرى بويىنشا سوت تالقىلاۋى ءجۇرىپ جاتقانىن اتاپ ءوتتى. باسقا مۇشەلەر، سونىڭ ىشىندە كۇدىكتى دە، تەرگەۋدەن جاسىرىنىپ، حالىقارالىق ىزدەۋ جاريالانعان. اعىمداعى جىلدىڭ قاڭتارىندا كۇدىكتى گرۋزيا اۋماعىندا ۇستالىپ، باس پروكۋراتۋرانىڭ سۇراۋى بويىنشا قازاقستانعا ەكستراديسيالاندى.
قازىرگى ۋاقىتتا ەر ادام تەرگەۋ يزولياتورىنا قامالدى. وعان تاعىلعان ايىپتار بويىنشا م ۇلىكتى تاركىلەۋمەن 20 جىلعا دەيىن باس بوستاندىعىنان ايىرۋ جازاسى قاراستىرىلعان.