قازاقستان مەكتەپتەرىندە 1 قىركۇيەكتە ءبىرىڭعاي سىنىپ ساعاتتارى وتەدى، الايدا مۇعالىمدەرگە گۇل شوقتارىن تاپسىرۋ ءداستۇرى شەكتەلەدى. بۇل تۋرالى ورتالىق كوممۋنيكاسيالار قىزمەتىندەگى بريفينگتە وقۋ-اعارتۋ ۆيسە-مينيسترى شىنار اقپاروۆا مالىمدەدى، دەپ حابارلايدى infohub.kz سايتى.
ءىس-شارالاردىڭ ءبىرىڭعاي فورماتى بارلىق وقۋشىلاردى قامتيدى. ۆەدومستۆو باسشىسىنىڭ ورىنباسارى اتاپ وتكەندەي، مەكتەپتەردە سىنىپ ساعاتتارى، ال كوللەدجدەردە كۋراتورلىق ساعاتتار شامامەن 45 مينۋتقا سوزىلادى.
بريفينگ بارىسىندا مۇعالىمدەرگە گۇل مەن سىيلىق تارتۋ داستۇرىنە ەرەكشە نازار اۋدارىلدى. مينيسترلىك جەرگىلىكتى اتقارۋشى ورگاندار مەن اكىمدىكتەرگە رەسمي نۇسقاۋلىق حاتتار جىبەرگەنىن اتاپ ءوتتى.
«مەكتەپ قابىرعاسىندا مۇعالىمدەرگە گۇل سىيلاۋعا نەمەسە كەز كەلگەن سىيلىق ساتىپ الۋعا جول بەرىلمەيدى. ءبىز مۇنى جەكە جازىپ كورسەتتىك. بۇعان ەش قاجەتتىلىك جوق. بارلىق ءبىلىم بەرۋ ۇيىمدارىندا ءداستۇرلى سىنىپ جانە كۋراتورلىق ساعاتتار ءوتۋى ءتيىس»، — دەدى شىنار اقپاروۆا.
ايتا كەتەيىك، بالانى ءبىرىنشى سىنىپقا وقۋ جىلىنىڭ باسىندا ءالى 6 جاسقا تولماسا دا بەرۋگە بولادى. ەڭ باستىسى، ونىڭ 6 جاسقا تولۋى اعىمداعى كۇنتىزبەلىك جىلدىڭ سوڭىنا دەيىن بولۋى كەرەك.