عالىمدار جىلدار بويى ءارتۇرلى ەلدەردىڭ تۇرعىندارىن الاڭداتىپ كەلگەن جاھاندىق تومەنگى جيىلىكتى شۋدىڭ قۇپياسىن اشتى. بۇل دىبىستار قۇپيا نىسانداردان نەمەسە مۇحيتتان شىقپايدى، ادامنىڭ ەستۋ جۇيەسىندە پايدا بولادى، دەپ جازادى Science Daily، infohub.kz حابارلايدى.
«گۋىل» (The Hum) دەپ اتالاتىن فەنومەن ونداعان جىلدار بويى اقش، ۇلىبريتانيا جانە باسقا ەلدەردە تىركەلىپ كەلەدى. ادامدار ءۇيدىڭ ىشىندە تۇندە ەستىلەتىن، قوزعالتقىشتىڭ جۇمىسىنا ۇقساس تومەنگى جيىلىكتى دىبىسقا شاعىمدانادى. ونى اينالاداعىلار بايقاماۋى مۇمكىن. نورۆەگيا عىلىم جانە تەحنولوگيا ۋنيۆەرسيتەتىنىڭ پروفەسسورى ماركۋس درەكسل باسقاراتىن زەرتتەۋ توبى وسى قۇبىلىستان زارداپ شەگەتىن 28 ادامدى سىنادى.
الدىمەن عالىمدار بۇل ادامداردىڭ ەستۋ قابىلەتى ەرەكشە، زاۋىتتاردىڭ نەمەسە مۇحيت تولقىندارىنىڭ قاشىقتاعى دىرىلدەرىن ۇستاي الاتىنىن تەكسەردى. بۇل تەوريا تەك ەكى قاتىسۋشىدا راستالدى. سودان كەيىن ماماندار سپونتاندى وتواكۋستيكالىق ەميسسيانى — ىشكى قۇلاقتىڭ ءوزى شىعاراتىن ميكرو-دىبىستاردى ولشەدى. ءبىراق بۇل فاكتور دا سەبەپ بولمادى. «PLOS One» جۋرنالىندا جاريالانعان جۇمىستىڭ اۆتورلارى كوپ جاعدايدا جاھاندىق گۋىل سۋبەكتيۆتى تومەنگى جيىلىكتى تيننيتۋستىڭ (قۇلاقتىڭ شۋى) ەرەكشە ءتۇرى دەگەن قورىتىندىعا كەلدى. ادام بۇل ەستۋ جۇيەسىنىڭ اقاۋىن شىنايى تۇردە سىرتقى تىتىركەندىرگىش رەتىندە قابىلدايدى.