گۆينەيا استاناسى كوناكريدەگى الىپ قوقىس ءۇيىندىسىنىڭ وپىرىلۋى سالدارىنان 30 ادام قازا تاپتى. بۇل تۋرالى ۇكىمەتتىڭ جەكسەنبىدەگى مالىمدەمەسىندە حابارلاندى. تۇنگى قاتتى جاڭبىردان كەيىن ورىن العان وپىرىلىس ماڭايداعى شاتىرلار مەن لاشىقتاردى باسىپ قالعان.
بۇل وقيعا ۇكىمەتتىڭ قوقىس الاڭىن جاۋىپ، قالدىقتاردى باسقا جەرگە كوشىرۋ جوسپارىن جاريالاعانىنان ءبىر اپتادان از ۋاقىت وتكەن سوڭ بولدى. سەبەبى بۇل الاڭ، اسىرەسە جاڭبىرلى ماۋسىمدا ءقاۋىپ توندىرەتىن ەدى. باتىس افريكانىڭ كوپتەگەن قالالارىندا جىل سايىن جاڭبىرلى ماۋسىمدا توپىراق وپىرىلىپ، سۋ تاسقىنى ادام ولىمىنە اكەلىپ جاتادى.
ۇكىمەت مالىمدەمەسىنە سايكەس، وپىرىلىس كوناكريدەگى گبەسسيا كوممۋناسىندا جەرگىلىكتى ۋاقىت بويىنشا تاڭعى ساعات 2 شاماسىندا بولعان. قازا تاپقاندار سانى 30 ادامدى قۇرادى، تاعى 6 ادام اۋىر، 16 ادام جەڭىل جاراقات الدى.
قۇتقارۋشىلار ەكسكاۆاتورلار مەن باسقا قۇرالداردى پايدالانىپ، وپىرىلعان جەردى تازارتۋدا. كۋاگەرلەردىڭ ايتۋىنشا، وپىرىلىس كولەمى كوپقاباتتى ءۇيدى دە، قاراپايىم باسپانالاردى دا باسىپ قالعان.
وقيعا ورنىنداعى ايەل سيرە ديللو جۋرناليستەرگە بەس بالاسىنىڭ قازا تاپقانىن ايتتى. «مەن بارلىق بالالارىمنان ايىرىلدىم. ەندى تەك قۇدايعا سەنۋ عانا قالدى»، — دەدى ول.
گۆينەيا الەمدەگى ەڭ ءىرى بوكسيت قورىنا جانە سيماندۋداعى ەڭ باي تەمىر كەن ورنىنا يە. قاراشا ايىندا ءىرى تاۋ-كەن جوباسى باستالعان بولاتىن. دەگەنمەن، بۇل باتىس افريكا ەلىنىڭ ينفراقۇرىلىمى ناشار، كەدەيشىلىك كەڭ تاراعان. ساۋىردە جاريالانعان دۇنيەجۇزىلىك بانك ەسەبىنە سايكەس، ەلدىڭ 15،1 ميلليون تۇرعىنىنىڭ 3،7 ميلليونى كۇنىنە 4،20 دوللاردان از اقشاعا ءومىر سۇرەدى.
بەيسەنبىدە گۆينەيانىڭ اكىمشىلىك ىستەر ءمينيسترى دجەننابۋ تۋرە كامارا قوقىس الاڭى ءقاۋىپتى بولعاندىقتان جابىلاتىنىن جانە قالدىقتاردىڭ كوناكريدەن تىس جەرگە كوشىرىلەتىنىن مالىمدەگەن ەدى.
پرەمەر-مينيستر امادۋ وۋري باح جەكسەنبىدە قوقىس الاڭىنا بارىپ، جاعدايدى باعالاپ، قۇتقارۋ جۇمىستارىنا باسشىلىق ەتتى. ۇكىمەت مالىمدەمەسىندە ادامداردى «سابىر ساقتاۋعا، بىرلىك تانىتۋعا جانە قۇتقارۋ قىزمەتتەرى مەن ۋاكىلەتتى ورگانداردىڭ نۇسقاۋلارىن قاتاڭ ورىنداۋعا» شاقىردى.