گۆينەيا استاناسى كوناكريدەگى ءىرى قوقىس پوليگونىنداعى ءۇيىندى وپىرىلىپ، ماڭايداعى ۇيلەردى باسىپ قالدى. ۇكىمەتتىڭ مالىمەتىنشە، كەم دەگەندە 30 ادام قازا تاپتى. تاعى 22 ادام جاراقات الدى، ونىڭ التاۋى اۋىر جاعدايدا. بۇل وقيعا دار-ەس-سالام اۋدانىندا بولدى.
تۇنگى جاڭبىردان كەيىن جەرگىلىكتى ۋاقىت بويىنشا ساعات 02:00 شاماسىندا بولعان وپىرىلىستان كەيىن امان قالعانداردى ىزدەۋگە اسكەريلەردى قوسا العاندا، «ەلەۋلى» كۇش پەن رەسۋرس جۇمىلدىرىلدى، دەلىنگەن ۇكىمەت مالىمدەمەسىندە.
ءبىر ايەل جەرگىلىكتى باق-قا بەس بالاسىنىڭ قازا تاپقانىن ايتتى. قۇرباندار سانىنىڭ ارتۋى مۇمكىن دەگەن ءقاۋىپ بار.
كەيىنىرەك قۇتقارۋشىلار ەكسكاۆاتورلارمەن شاشىلىپ جاتقان قوقىس ءۇيىندىسىن اقتارىپ جاتقانى كورىندى، جاقىن جەردە جەرگىلىكتى تۇرعىندار جينالدى.
گۆينەيا پرەمەر-مينيسترى مامادۋ ۋري با احۋالدى باعالاۋ جانە ىزدەۋ جۇمىستارىن باسقارۋ ءۇشىن وقيعا ورنىنا باردى. اۋدان باسشىسى لانسين سيلا بۇعان دەيىن AFP اگەنتتىگىنە قۇرباندار سانى كوپ بولاتىنىنان قاۋىپتەنەتىنىن ايتقان. «ءبىز مورگكە جەتكىزىلگەن 18 ءمايىتتى شىعاردىق»، — دەدى ول.
2017 جىلى ءدال وسى پوليگوندا بولعان كوشكىن سالدارىنان 10 ادام قازا تاپقان ەدى.