بۇعان دەيىن «دودو پيسسا» دەرەقورىن بۇزعانىن جاريالاعان DATASUCKERS حاكەرلىك توبى قازاقستان بويىنشا ستاتيستيكاسىن جاريالادى. ولاردىڭ تۇجىرىمىنشا، قولعا تۇسكەن دەرەكتەردە 6،5 ملن قازاقستاندىق كليەنت تۋرالى اقپارات بار، دەپ حابارلايدى infohub.kz سايتى.
توپتىڭ مالىمدەمەسىنە سايكەس، قازاقستان بويىنشا بازادا 6 537 929 بىرەگەي تەلەفون ءنومىرى، 6 725 137 كليەنت جانە 59 ملن-نان استام بىرەگەي تاپسىرىس بار. جالپى العاندا، حاكەرلەر ءتۇرلى وقيعالار تۋرالى 522 ملن جازبا بار دەيدى.
دالەل رەتىندە DATASUCKERS قازاقستاننان سوڭعى تىركەلگەن 1 000 پايدالانۋشىنىڭ دەرەكتەرىن دە جاريالادى، الايدا كەيىن بۇل ءۇزىندى جويىلدى.
بۇعان دەيىن «دودو پيسسا» ءوزىنىڭ Telegram-ارناسىندا كومپانيانىڭ IT-جۇيەسىنە كيبەراتاكا بولعانىن راستادى. پيسسا ءوندىرۋشىسى قاسكويلەر كليەنتتەردىڭ ءبىر بولىگىنىڭ دەرەكتەرىنە — اتى-جونىنە، مەكەنجايىنا، ەلەكتروندىق پوشتاسىنا، تەلەفون نومىرلەرىنە، تۋعان كۇندەرىنە جانە تاپسىرىس تاريحىنا — قول جەتكىزۋى مۇمكىن دەپ جورامالدادى.
سونىمەن قاتار «دودو پيسسا» شابۋىلعا ۇشىراعان جۇيەدە كليەنتتەردىڭ تولەم وپەراسيالارى تۋرالى دەرەكتەردى ساقتامايتىنىن، سوندىقتان ولار حاكەرلەرگە تيمەگەنىن مالىمدەدى.
DATASUCKERS حاكەرلىك توبىنىڭ اقپاراتىنشا، «دودو پيسسا» كليەنتتەرىنىڭ شامامەن 68 ملن-ى تۋرالى 2–3 تب اقپارات، ونىڭ ىشىندە ءارتۇرلى ەلدەردەگى پايدالانۋشىلاردىڭ دەرەكتەرى مەن تاپسىرىس تاريحى ۇرلانعان. بۇل ساندارعا ازىرگە تاۋەلسىز راستاۋ جوق، ال كومپانيانىڭ ءوزى زارداپ شەككەن كليەنتتەردىڭ ناقتى سانىن جاريالاعان جوق.