قىتايلىق Haval Raptor كروسسوۆەرى قازاقستان نارىعى ءۇشىن رەسمي تۇردە سەرتيفيكاسيالاندى: مودەل كولىك قۇرالى ءتۇرىن بەكىتۋدەن (وتتس) ءوتتى، بۇل تۋرالى اقپارات «قازستاندارت» اشىق تىزىلىمىندە پايدا بولدى. اۆتوكولىك ساتىلىمعا دايىندالۋدا، ال ونىڭ ءوندىرىسى AMMKZ زاۋىتىندا ۇيىمداستىرىلادى، دەپ حابارلايدى infohub.kz سايتى.
قۇجاتتارعا سايكەس، جەرگىلىكتى نارىقتا جاڭا مودەل تانىس قىتايلىق Raptor اتاۋىمەن ەمەس، Haval H7 رەتىندە ساتىلادى. بۇعان دەيىن مودەل قازاقستاندىق جۋرناليستەرگە Haval V7 اتاۋىمەن تانىستىرىلعان ەدى، الايدا كەيىن ونى H-سەرياسىنا جاتقىزۋ تۋرالى شەشىم قابىلداندى.
سونىمەن قاتار، قازاقستاندىق H7ء-نى رەسەيدەگى اتتاس كروسسوۆەرمەن شاتاستىرۋعا بولمايدى. وندا بۇل اتاۋمەن باسقا مودەل — Dargo Plus بەلگىلى. قازاقستاندىق Raptor-مەن ولاردى تەك GWMء-نىڭ Lemon مودۋلدىك ارحيتەكتۋراسى بىرىكتىرەدى.
قازاقستان ءۇشىن الدىڭعى جانە تولىق جەتەكتى نۇسقالار سەرتيفيكاسيالاندى. كاپوت استىندا قۋاتى 231 ات كۇشى جانە اينالۋ مومەنتى 380 نم بولاتىن 2 ليترلىك GW4N20A تۋربوقوزعالتقىشى ورناتىلعان. قوزعالتقىش اي-92 بەنزينىنە ەسەپتەلگەن جانە 9 ساتىلى روبوتتى بەرىلىس قورابىمەن جۇمىس ىستەيدى.
كروسسوۆەردىڭ ولشەمدەرى 4680 x 1950 x 1843 مم، دوڭعالاق بازاسى — 2738 مم. بەسىنشى ەسىكتەگى قوسالقى دوڭگەلەكپەن ۇزىندىعى 4800 مم-گە جەتەدى.
Haval Raptor شىعارىلىمى Astana Motors Manufacturing Kazakhstan مۋلتيبرەندتىك زاۋىتىندا ۇيىمداستىرىلادى. وتتس 2029 جىلدىڭ 10 تامىزىنا دەيىن جارامدى.
سالوندا ەكى قاتار ورىندىقتار، 12،3 ديۋيمدىك سيفرلىق پانەل جانە 14،6 ديۋيمدىك ورتالىق ەكران قاراستىرىلعان. جابدىقتار قاتارىندا ءاداپتيۆتى كرۋيز-كونترول، جولاقتا ۇستاۋ جۇيەسى، اۆتوماتتى اۆاريالىق تەجەۋ، اينالمالى شولۋ جانە تۇراق كومەكشىسى بار.
باعاسى مەن ساتىلىم باستالاتىن مەرزىمدى ديستريبيۋتور ازىرگە جاريالاعان جوق. پوزيسيالاۋ بويىنشا H7 Haval H6-دان جوعارى بولۋى كەرەك، ول ءقازىر قازاقستاندا ارنايى ۇسىنىستاردى ەسەپتەمەگەندە 12،4 ملن تەڭگەدەن باستالادى.
بۇعان دەيىن قازاقستاندا گيبريدتى Haval H6 شىعارۋ جوسپارلانىپ جاتقانى حابارلانعان بولاتىن.