ارگەنتينا پرەزيدەنتى حاۆەر ميلەي برازيليا پرەزيدەنتى لۋلانى «ۇرى» ءارى «سوتتالعان» دەپ اتادى. وسىعان وراي برازيليا بۋەنوس-ايرەستەگى ەلشىسىن كەرى شاقىرتتى، دەپ حابارلايدى infohub.kz.
ميلەي بۇل سوزدەردى جەكسەنبى كۇنى سان-پاۋلۋدا وڭشىل كانديدات فلاۆيۋ بولسونارۋدىڭ سايلاۋالدى ناۋقانىن ىسكە قوسۋ شاراسىندا ايتتى. ول لۋلانىڭ اتىن اتاماسا دا، «ۇرى» جانە «سوتتالعان» دەپ برازيليا پرەزيدەنتىن مەڭزەدى. سونىمەن قاتار ميلەي فلاۆيۋ بولسونارۋدى عانا «لۋلانى توقتاتا الاتىن» ادام دەپ اتادى.
برازيليا ديپلوماتتارى كەيىن ارگەنتينا باسشىسىنىڭ برازيليا ۇكىمەتىنە، حالقىنا جانە دەموكراتياسىنا ءتىل تيگىزگەنىن مالىمدەدى. لۋلا بولسا سول كۇنى كەشكە «ەشكىمنىڭ ارالاسۋىنسىز» باسشىلىق ەتەتىنىن، «برازيليادا ەشكىمگە مۇرنىن تىعىپ، ءوز ءىسى ەمەس جەرگە ارالاسۋعا جول بەرمەيتىنىن» ايتتى.
افپ حابارلاۋىنشا، برازيليانىڭ ارگەنتيناداعى ەلشىسى حۋليو بيتەللي جەكسەنبى مەن دۇيسەنبى ارالىعىندا ەلگە قايتپاق. فلاۆيۋ بولسونارۋ — برازيليانىڭ بۇرىنعى پرەزيدەنتى جاير بولسونارۋدىڭ ۇلى. جاير بولسونارۋ وتكەن جىلى لۋلاعا سايلاۋدا جەڭىلىپ، بيلىكتە قالۋ ءۇشىن توڭكەرىس جاساۋعا قاتىسقانى ءۇشىن 27 جىلدان استام تۇرمەگە سوتتالدى.
ميلەي جاير بولسونارۋدىڭ ءىسىن قاراعان برازيليا جوعارعى سوتىنىڭ سۋدياسى الەكساندرە دە موراەستى «تۇككە تۇرعىسىز تاز» دەپ اتادى. موراەس بۇعان دەيىن ميلەيگە ءۇي قاماۋىندا وتىرعان بولسونارۋعا بارۋىنا رۇقسات بەرمەگەن.
لۋلا 2018 جىلى سىبايلاس جەمقورلىق جانە پاراقورلىق ءىسى بويىنشا 12 جىلعا سوتتالعان، ءبىراق 18 ايعا جۋىق وتىرىپ، بوساتىلدى. 2021 جىلى جوعارعى سوت ونىڭ ۇكىمىن جويدى، ال كەلەسى جىلى وتكەن پرەزيدەنتتىك سايلاۋدا ول سول كەزدەگى پرەزيدەنت جاير بولسونارۋدى 50،9% داۋىسپەن جەڭدى.