امەريكالىق اكتريسا حايدەن پانەتتەردىڭ ءولىمىنىڭ رەسمي سەبەبى انىقتالدى: «گەروي» مەن «نەشۆيلل» سەريالدارىنىڭ 36 جاستاعى جۇلدىزى فەنتانيل مەن ءبىرقاتار باسقا پرەپاراتتى كەزدەيسوق ارتىق مولشەردە قابىلداۋدان كوز جۇمدى. بۇل تۋرالى ساراپشىلار مالىمدەدى، دەپ حابارلايدى Variety، infohub.kz سايتىنا سىلتەمە جاساپ.
وڭتۇستىك كارولينا شتاتىنداعى گرينۆيلل وكرۋگىنىڭ كورونەر كەڭسەسى اكتريسانىڭ ولىمىنە قاتىستى توكسيكولوگيالىق ساراپتاما ناتيجەلەرىن جاريالادى. مەديسينالىق ساراپشىلاردىڭ رەسمي مالىمدەمەسىنە سايكەس، ءارتىس فەنتانيل، الپرازولام، مەتوكاربامول، كۆەتياپين جانە 4-ANPP زاتىنىڭ ۋلى اسەرىنەن قازا تاپقان.
پانەتتەردىڭ ءولىمى جازاتايىم وقيعا دەپ تانىلدى. ونىڭ دەنەسىنەن جاراقات نەمەسە زورلىق-زومبىلىق ىزدەرى تابىلماعان. جەرگىلىكتى پوليسيا وكىلدەرى دە وقيعا ورنىن العاشقى تەكسەرۋ كەزىندە كۇدىكتى ءمان-جاي نەمەسە قىلمىس بەلگىسى انىقتالماعانىن راستادى.
اكتريسا 2026 جىلعى 16 تامىزدا گرينۆيلل قالاسىنداعى پاتەرىندە قايتىس بولدى. شاقىرتۋ بويىنشا كەلگەن دارىگەرلەر 40 مينۋتتان استام رەانيماسيالىق شارالار جۇرگىزدى، الايدا پانەتتەردىڭ ءومىرىن ساقتاپ قالۋ مۇمكىن بولمادى، ول وقيعا ورنىندا ءولى دەپ جاريالاندى. وقيعا كەزىندە پاتەردە ونىڭ جىگىتى برايان حيكەرسون اعاسىمەن بىرگە بولعان، ولار جەدەل قىزمەتتەردى شاقىرعان.
حايدەن پانەتتەر اكتەرلىك مانسابىن بالا كەزىنەن باستاپ، جارنامالىق روليكتەر مەن تەلەشوۋلارعا تۇسكەن. وعان الەمگە ايگىلىلىكتى «گەروي» فانتاستيكالىق سەريالىنداعى كلەر بەننەت ءرولى، سونداي-اق «نەشۆيلل» دراماسىنا قاتىسۋى اكەلدى. سوڭعى جىلدارى ءارتىس پسيحيكالىق ماسەلەلەرمەن جانە تاۋەلدىلىكپەن كۇرەسى تۋرالى اشىق ايتىپ ءجۇردى. قۇقىق قورعاۋ ورگاندارى بولعان وقيعانىڭ بارلىق ەگجەي-تەگجەيىن تەرگەۋدى جالعاستىرۋدا.