Home Credit Bank باسشىلىعى 2025 جىلعا 1،3 ملرد تەڭگە كولەمىندە سىياقى العانىن infohub.kz سايتى حابارلايدى.
بانك باسقارماسىنىڭ قۇرامىندا ءۇش ادام بولدى، ولار جەلتوقسان ايىنىڭ سوڭىندا اكسيونەرلەر اۋىسقاننان كەيىن بانكتەن كەتتى. ورتا ەسەپپەن ءارقايسىسى جىلىنا 439 ملن تەڭگە الدى.
2025 جىلى Home Credit Bank باسقارما مۇشەلەرىنە تولەنگەن جالپى سوما 1،3 ملرد تەڭگەنى قۇرادى. بۇل سوماعا جالاقىلار مەن بارلىق اقشالاي كوتەرمەلەۋ تۇرلەرى كىرەدى. سونىمەن قاتار، وتكەن جىلمەن سالىستىرعاندا بانك باسشىلىعىنىڭ سىياقىسى بەس ەسە ءوستى: 2024 جىلى ول 293 ملن تەڭگەنى قۇراعان ەدى.
بانك باسقارماسى 2025 جىلدىڭ سوڭىنا دەيىن، سونداي-اق 2024 جىل بويى ءۇش ادامنان تۇردى: بولگاريادان شىققان باسقارما ءتوراعاسى كيريل باچۆاروۆ، قازاقستاندىق ۆيكتور باتراك جانە چەحيادان كەلگەن زدەنەك فوۋكال.
11 جەلتوقساندا بانكتىڭ باقىلاۋ پاكەتى ForteBank-كە وتكەننەن كەيىن، Home Credit Bank باسقارماسىنىڭ جاڭا ءتوراعاسى شولپان نۇرىمبەت بولعانى جاريالاندى. جىل سوڭىنا قاراي بانك باسقارماسىنىڭ قۇرامى تولىعىمەن جاڭارتىلدى. باچۆاروۆ پەن فوۋكالدىڭ ورنىنا دينارا احاتوۆا، گاۋحار ماسانعاليەۆا جانە ستانيسلاۆ تيان كەلدى.
وسىلايشا، جىلدىڭ كوپ بولىگىندە باسقارما قۇرامى وزگەرمەگەنىن ەسكەرسەك، ونىڭ مۇشەلەرى ورتا ەسەپپەن جىلىنا 439 ملن تەڭگە الدى. بۇل ايىنا 36،6 ملن تەڭگە تابىسقا تەڭ.
ايتا كەتەيىك، 2025 جىلدىڭ ورتاسىنا دەيىن Home Credit Bank چەحيالىق PPF Financial Holdings كومپانياسىنىڭ قىزمەتكەرلەرىنە جانە تىكەلەي كومپانيانىڭ وزىنە تيەسىلى بولدى. ءىرى اكسيونەرلەردىڭ ءبىرى كومپانيانىڭ توپ-مەنەدجەرى يرجي شمەيس ەدى. PPFء-تىڭ يەسى — چەحياداعى ەڭ باي ايەل رەناتا كەللنەروۆانىڭ وتباسى (ونىڭ بايلىعى $19 ملرد دەپ باعالانادى).
ماۋسىم ايىندا ForteBank Home Credit Bankء-تىڭ 100% اكسياسىن ساتىپ الۋ تۋرالى ءپرينسيپتى كەلىسىمگە قول جەتكىزدى. مامىلە جەلتوقسان ايىنىڭ سوڭىندا اياقتالدى.