الەمدىك تۇساۋكەسەرگە دايىندالىپ جاتقان جاڭا Hyundai Tucson ەرەكشە وقيعانىڭ ورتاسىنان تابىلدى: اۆستريا الپىسىندەگى سىناق كەزىندە سەرياعا دەيىنگى كروسسوۆەردىڭ الدىڭعى تەجەگىشتەرى قىزىپ كەتىپ، ءورت شىقتى، دەپ حابارلايدى infohub.kz سايتى.
The Korean Car Blog باسىلىمىنىڭ دەرەگىنشە، Hyundai ينجەنەرلەرى تەجەگىش جۇيەسىنىڭ تيىمدىلىگىن ەكسترەمالدى جاعدايدا تەكسەرگەن. ول ءۇشىن پروتوتيپ تىركەمەمەن تاۋلى سەرپانتينمەن كوتەرىلىپ، ماكسيمالدى جۇكتەمە جاساعان. الدىمەن كولىكتىڭ الدىڭعى بولىگىنەن قويۋ ءتۇتىن شىعىپ، كەيىن الدىڭعى وستە جالىن تۇتانعان. ءورتتى ءسوندىرۋ ءۇشىن كوماندا بىرنەشە ءورت سوندىرگىشتى قولدانۋعا ءماجبۇر بولعان. جوعارى تەمپەراتۋرادان ەكى الدىڭعى دوڭگەلەك تە جارىلىپ، سىناقتى توقتاتۋعا تۋرا كەلگەن.
ءبىر قاراعاندا، بۇل جاعداي Hyundai ءۇشىن ىڭعايسىز بولىپ كورىنەدى. الايدا مۇنداي وقيعالار ءدال زاۋىتتىق سىناقتار كەزىندە بولادى، ويتكەنى ينجەنەرلەر قاراپايىم جۇرگىزۋشى ەشقاشان كەزدەستىرمەيتىن جاعدايلاردى ادەيى جاسايدى. بۇل سىناقتاردىڭ ماقساتى – كولىك نارىققا شىققانعا دەيىن ءالسىز تۇستارىن انىقتاۋ.
جاڭا بۋىن Hyundai Tucson (NX5) گيبريدتى نۇسقالارعا باسىمدىق بەرەدى. ب ا ق دەرەكتەرىنە سۇيەنسەك، كروسسوۆەر جاڭا TMED-II قۋات قوندىرعىسىن، ەلەكتر قۋاتىمەن شامامەن 100 كم جۇرەتىن قوسىلاتىن گيبريدتى، سونداي-اق قۋاتى 300 ات كۇشىنەن اساتىن N نۇسقاسىن الادى. XRT Pro جولدان تىس موديفيكاسياسى دا كۇتىلۋدە. مودەلدىڭ الەمدىك تۇساۋكەسەرى 2026 جىلدىڭ سوڭىنا جوسپارلانعان.
بۇعان دەيىن جاڭا Tucson ىشكى كورىنىسى العاش رەت كورسەتىلگەن بولاتىن. سونداي-اق Hyundai جاڭا بۋىندا Kona كروسسوۆەرىنىڭ سىرتقى كەلبەتىن تۇبەگەيلى وزگەرتەتىنى حابارلانعان.