Hyundai Tucson كروسسوۆەرىنىڭ N يندەكسىمەن شىعاتىن العاشقى جوعارى ءونىمدى نۇسقاسىن دايىنداپ جاتىر. جاڭا مودەل گيبريدتى قوندىرعىمەن، تولىق جەتەكپەن جانە ۇنەمدىلىككە ەمەس، ديناميكاعا باعىتتالعان باپتاۋلارمەن جابدىقتالادى دەپ كۇتىلۋدە، دەپ حابارلايدى infohub.kz سايتى.
الدىن الا مالىمەتتەر بويىنشا، Tucson N 1،6 ليترلىك بەنزين-ەلەكتر قوندىرعىسىنىڭ جاڭا بۋىنىمەن جابدىقتالادى. ونىڭ قۋاتى شامامەن 300 ات كۇشىن قۇراۋى مۇمكىن. ارتقى وستە تولىق جەتەكتى قامتاماسىز ەتەتىن جەكە ەلەكتر قوزعالتقىش ورناتىلۋى ىقتيمال.
Hyundai N بولىمشەسىنىڭ باسشىسى دجۋن پاك كومپانيا گيبريدتەرگە ەكى ءتاسىلدى قاراستىرىپ جاتقانىن ايتتى: ءبىرىنشىسى ماكسيمالدى تيىمدىلىككە، ەكىنشىسى ونىمدىلىككە باعىتتالعان. N ۇلگىلەرى ءۇشىن ەكىنشى نۇسقا تاڭدالادى.
«ءبىز تەك ەلەكتروموبيلدەرمەن شەكتەلمەيمىز»، — دەدى پاك.
Hyundai جوسپارى بويىنشا، ەلەكتر بولىگى جىلدام جاۋاپ پەن قوسىمشا اينالۋ مومەنتىن قامتاماسىز ەتسە، بەنزين قوزعالتقىشى N-مودەلدەرگە ءتان مىنەزدى ساقتايدى. Tucson Nء-دى كادىمگى گيبريدتى كروسسوۆەردەن جەڭىل ءارى يكەمدى ەتۋ جوسپارلانۋدا. پاك بولاشاق مودەلدى جەڭىلىرەك، قوزعالمالى جانە قۇمارلىققا تولى دەپ سيپاتتادى.
سىرتقى كەلبەتى ازىرگە بولجام دەڭگەيىندە قالىپ وتىر. The Korean Car Blog Tucson-نىڭ كەلەسى بۋىنىنىڭ تىڭشىلىق سۋرەتتەرىنە نەگىزدەلگەن رەندەر جاريالادى. وعان قاراعاندا، كروسسوۆەر جاڭا Santa Fe ەلەمەنتتەرىمەن اگرەسسيۆتى ديزاينعا يە بولۋى مۇمكىن.
Tucson Hyundai Nء-دىڭ گيبريدتى قوندىرعىسى بار العاشقى مودەلى عانا بولۋى مۇمكىن. كومپانيا بۇل تەحنولوگيانى بولاشاق Kona N، i20 N جانە i30 N نۇسقالارى ءۇشىن دە قاراستىرۋدا. ولار ءۇشىن Hyundai سپورتتىق مودەلدەردىڭ ماسساسىن ارتتىرماۋ ءۇشىن ىقشام ءارى جەڭىل باتارەيالاردى قولدانعىسى كەلەدى.
وسىلايشا، Hyundai N ىشتەن جاناتىن قوزعالتقىشتاردان باس تارتپايدى، كەرىسىنشە ولاردى ەلەكتر تارتىمىمەن ۇشتاستىرعىسى كەلەدى، بۇل اۆتوموبيل ديناميكاسىن جاقسارتا الادى.