اقش-تا يمميگراسيالىق اگەنتتىك قىزمەتكەرىنە قاتىستى ءىرى ايىپ تاعىلدى. ول ۆەنەسۋەلالىق ازاماتتى اتىپ، بۇل تۋرالى جالعان مالىمدەمە جاساعانى ءۇشىن سوت الدىندا جاۋاپ بەرەدى. بۇل تۋرالى infohub.kz سايتى حابارلايدى.
اقش فەدەرالدىق سوتىنىڭ ۇلكەن القاسى كاستروعا قاتىستى التى باپتان تۇراتىن ايىپتاۋ قورىتىندىسىن شىعاردى. بۇل تۋرالى CBS اقپارات كوزى حابارلادى. اقش بيلىگىنىڭ مالىمەتىنشە، كاسترو قاماۋعا الىنعاننان كەيىن ايىپتاۋ قۇجاتى جاريا ەتىلەدى دەپ كۇتىلۋدە.
ايىپتاۋلار تەحاس گۋبەرناتورىنىڭ كاسترونى ميننەسوتا شتاتىنا ەكستراديسيالاۋدان باس تارتۋىنان كەيىن جاسالدى. ميننەسوتادا وعان اتۋ وقيعاسىنا بايلانىستى جەكە ايىپتار تاعىلعان. ول مامىر ايىندا تەحاستا قاماۋعا الىنىپ، ءۇش اي تۇرمەدە وتىرعان.
كاسترو «وپەراسيا Metro Surge» كەزىندە ميننەسوتاعا جىبەرىلگەن مىڭداعان فەدەرالدى يمميگراسيالىق قىزمەتكەرلەردىڭ ءبىرى بولعان. بۇل وپەراسيا قاتتى نارازىلىقتارعا ۇلاسىپ، قاقتىعىستار كەزىندە ەكى امەريكالىق ازاماتتىڭ قازاسىنا سەبەپ بولدى.
الفرەدو الەحاندرو الحورنا جانە اياعىنان جارالانىپ، ءتىرى قالعان حۋليو سەسار سوسا-سەليس باستاپقىدا فەدەرالدى قىزمەتكەرلەرگە زورلىقپەن شابۋىل جاسادى، قارسىلىق كورسەتتى نەمەسە كەدەرگى كەلتىردى دەپ ايىپتالعان. ءبىراق بەينەباقىلاۋ جازبالارى وقيعانىڭ بۇل نۇسقاسىنا كۇمان تۋدىرعان سوڭ، فەدەرالدى پروكۋرورلار قىزمەتكەرلەرگە قاتىستى تەرگەۋ جۇرگىزدى.
اقپان ايىندا ICE ەكى يمميگراسيالىق اگەنت اتۋ وقيعاسى تۋرالى «شىندىققا جاناسپايتىن مالىمدەمەلەر» جاساعان بولۋى مۇمكىن دەپ مالىمدەدى. ولار اكىمشىلىك دەمالىسقا جىبەرىلدى. ميگرانتتارعا قاتىستى ايىپتاۋلار «جاڭادان انىقتالعان دالەلدەرگە» بايلانىستى جويىلدى، دەپ حابارلادى CBS.