بيىلعى پاروديالىق عىلىمي سىيلىق — يگنوبەل — العاش رەت اقش-تان تىس جەردە، سيۋريحتە ءوتتى. سالتاناتتى شاراعا قاتىسۋشىلاردىڭ ۆيزا الۋ قيىندىقتارىنا بايلانىستى ۇيىمداستىرۋشىلار 35 جىلدان كەيىن ەۋروپاعا اۋىستىرۋدى ءجون كوردى. بۇل تۋرالى infohub.kz سايتى حابارلايدى.
سىيلىقتىڭ بۇل جولعى يەگەرلەرى — 10 زەرتتەۋ توبى. ولاردىڭ قاتارىندا تاراقان ءسۇتىن زەرتتەگەن عالىمدار، ءىش كيىم ارقىلى توپىراق ساپاسىن انىقتاعان ماماندار، ءسۇيىسۋ ەۆوليۋسياسىن قالپىنا كەلتىرگەن وكسفورد ۋنيۆەرسيتەتىنىڭ وكىلدەرى ءماتيلدا بريندل مەن ستيۋارت ۆەست، سونداي-اق فلوريدا تەحنولوگيالىق ينستيتۋتىنان كەترين تالبوت جانە مۇرىن قاققان كەزدەگى پروسەستى زەرتتەگەن مارقۇم دوكتور توكۋدجي ۋننو بار.
ءداستۇر بويىنشا، شارا بارىسىندا كورەرمەندەر قاعاز ۇشاقتار جاساپ، ساحناعا لاقتىردى. بۇل — يگنوبەل سىيلىعىنىڭ اجىراماس بولىگى. سالتاناتتى ءراسىم شۆەيساريانىڭ سيۋريح قالاسىنداعى كونگرەسس-ورتالىقتا ءوتتى. جەڭىمپازدارعا ساڭىراۋقۇلاق پەن ادام اياعىنىڭ قوسىندىسىن ەسكە تۇسىرەتىن ارنايى مۇسىنشە تابىستالدى.
الداعى ۋاقىتتا ۇيىمداستىرۋشىلار سيۋريح پەن باسقا دا ەۋروپا قالالارىندا كەزەكتەسىپ وتكىزۋدى جوسپارلاپ وتىر. 2027 جىلى شارا بەلگيانىڭ انتۆەرپەن قالاسىندا وتەدى. بۇعان دەيىن يگنوبەل گارۆارد، ماسساچۋسەتس تەحنولوگيالىق ينستيتۋتى جانە بوستون ۋنيۆەرسيتەتىندە وتكەن ەدى. الايدا اقش-قا قايتا ورالۋ جوسپارى جوق.
شارانىڭ جۇرگىزۋشىسى ءارى جۋرنال رەداكتورى مارك ابراحامس ناۋرىز ايىندا Associated Press اگەنتتىگىنە جولداعان حاتىندا: «وتكەن جىل ىشىندە قوناقتارىمىزدىڭ ەلگە كەلۋى ءقاۋىپتى بولدى»، — دەپ مالىمدەگەن. يگنوبەل سىيلىعىنىڭ نوبەل سىيلىعىنا ەش قاتىسى جوق. ال نوبەل سىيلىعىنىڭ يەگەرلەرى قازان ايىنىڭ باسىندا جاريالانادى.