قازاقستان پوليسياسى جىل باسىنان بەرى اۆتوماتتار، تاپانشالار، مىلتىقتار، گراناتاتقىشتار مەن وق-دارىلەردى قوسا العاندا، 1700-دەن استام قىلمىستىق قارۋدى تاركىلەدى. بۇل تۋرالى infohub.kz سايتى حابارلايدى.
ىشكى ىستەر مينيسترلىگىنىڭ ۆەدومستۆولىق سايتىندا جاريالانعان دەرەكتەرگە سايكەس، تاركىلەنگەندەردىڭ ىشىندە 34 اۆتومات، 458 تاپانشا، مىڭنان استام مىلتىق، ءۇش گراناتاتقىش جانە شامامەن 12 مىڭ ءوق-دارى بار.
2022 جىلعى قاڭتار وقيعالارى كەزىندە ۇرلانعان قارۋدى ىزدەستىرۋگە ەرەكشە كوڭىل بولىنۋدە. بۇل جۇمىس بۇكىل ەل بويىنشا جالعاسۋدا. جىل باسىنان بەرى زاڭسىز اينالىمنان وسىنداي 152 بىرلىك قارۋ الىندى، تەك قىركۇيەكتە تاعى 9 بىرلىك تاركىلەندى.
«تامىزدا الماتى مەن وسكەمەندە پوليسيا قىزمەتكەرلەرى الماتى وبلىسىنىڭ ەكى تۇرعىنىنان الماتىداعى قارۋ دۇكەندەرىنەن قاڭتار وقيعالارى كەزىندە ۇرلانعان ءۇش بىرلىك قارۋدى تاركىلەدى. قىركۇيەك باسىندا تارازدا ۇيىندە ماكاروۆ تاپانشاسىن ساقتاعان جەرگىلىكتى تۇرعىن ۇستالدى. بۇل قارۋ دا 2022 جىلدىڭ قاڭتارىندا جامبىل وبلىسىندا ۇرلانعانى انىقتالدى. كۇدىكتىلەر قاماۋعا الىندى. تەرگەۋ جۇرگىزىلۋدە»، — دەلىنگەن پوليسيا حابارلاماسىندا.
سونىمەن قاتار، زاڭسىز ساقتالعان قارۋدى ەرىكتى تۇردە تاپسىرۋ جونىندەگى رەسپۋبليكالىق اكسيا دا جالعاسۋدا. 20 ساۋىردەن باستاپ ازاماتتار ەرىكتى تۇردە 900-دەن استام قارۋ مەن 6 مىڭعا جۋىق ءوق-دارى تاپسىردى.
«زاڭسىز ساقتالعان قارۋدى ەرىكتى تۇردە تاپسىرعان ادامدار زاڭدا بەلگىلەنگەن تارتىپپەن قىلمىستىق جانە اكىمشىلىك جاۋاپكەرشىلىكتەن بوساتىلادى. ەگەر قارۋدىڭ زاڭسىز ساقتالعان جەرلەرى تۋرالى بىلسەڭىز، «102» نومىرىنە نەمەسە eOtinish سەرۆيسى ارقىلى پوليسياعا حابارلاسىڭىز. انونيمدىلىككە كەپىلدىك بەرىلەدى»، — دەپ قوستى پوليسيا.