شومىلۋ ماۋسىمى باستالعاننان بەرى قازاقستاندا 69 بالا سۋعا كەتتى. وسىعان بايلانىستى ىشكى ىستەر مينيسترلىگى اتا-انالارعا ەسكەرتۋ جاسادى، دەپ حابارلايدى infohub.kz.
ءىىم ۆەدومستۆولىق سايتىنىڭ مالىمەتىنشە، باقىتسىز جاعدايلار كوبىنەسە جابدىقتالماعان جەرلەردە شومىلۋ سالدارىنان بولادى. بالالار ءتۇبى تەكسەرىلمەگەن، اينالىم مەن كۇشتى اعىسى بار ستيحيالىق جاعاجايلاردا شومىلادى. سونداي-اق ەرەسەكتەردىڭ دەمالۋ كەزىندە الكوگولدى ىشىمدىكتەردى تەرىس پايدالانۋى سالدارىنان بالالار نازارسىز قالىپ، قازا تابادى.
قۇقىق قورعاۋ ورگاندارى تىيىم سالىنعان جەرلەردە شومىلعانى ءۇشىن اكىمشىلىك جاۋاپكەرشىلىك (اقبتك-نىڭ 364-بابى) قاراستىرىلعانىن ەسكە سالدى. جىل باسىنان بەرى 2700-دەن استام قۇقىق بۇزۋشى جاۋاپقا تارتىلدى.
ءىىم سۋ ايدىندارىندا قاۋىپسىزدىك ەرەجەلەرىن ساقتاۋدى ۇسىنادى:
– جابدىقتالماعان جەرلەردە شومىلۋدان اۋلاق بولۋ؛
– دەمالىس كەزىندە بالالاردى قاداعالاپ، نازاردان تىس قالدىرماۋ؛
– بالالارعا بەيتانىس جەرلەردە شومىلۋدىڭ قاۋىپتىلىگىن ءتۇسىندىرۋ (كۇشتى اعىس، تاستار، قوقىس، اينالىمدار)؛
– ىستىقتا سۋىق سۋعا ءتۇسۋدىڭ ءقاۋىپتى ەكەنىن ەسكەرۋ – كەنەتتەن تەمپەراتۋرا وزگەرىسى قان تامىرلارىنىڭ تۇيىلۋىنە جانە قۇرىسۋعا اكەلەدى.