جاڭا وقۋ جىلى باستالعالى بەرى قازاقستان پوليسەيلەرى مەكتەپتەر مەن وقۋ ورىندارىندا اۋقىمدى پروفيلاكتيكالىق جۇمىس جۇرگىزدى. ەندى ىشكى ىستەر مينيسترلىگى بارلىق اتا-انالار مەن كامەلەتكە تولماعانداردىڭ زاڭدى وكىلدەرىنە، سونداي-اق ستۋدەنت جاستار مەن ءوزىن-وزى جۇمىسپەن قامتىعان جاستارعا جۇگىندى، دەپ حابارلايدى infohub.kz سايتى.
ۆەدومستۆونىڭ تۇسىندىرۋىنشە، پروفيلاكتيكالىق ءىس-شارالار ەلدەگى بارلىق دەرلىك مەكتەپ پەن وقۋ ورنىن قامتىدى. بارلىعى 16 مىڭ پروفيلاكتيكالىق شارا وتكىزىلدى، ونىڭ 5 مىڭنان استامى تاجىريبەلى پەداگوگتەردىڭ، پسيحولوگتەردىڭ جانە ناركولوگ دارىگەرلەردىڭ قاتىسۋىمەن ءوتتى.
ءىىم دەرەگىنشە، بۇگىنگى تاڭدا ناشاقورلىق قىلمىسى بويىنشا 69 كامەلەتكە تولماعان جاس ۇستالدى. ولاردىڭ 40-ى ەسىرتكى ساتقانى ءۇشىن، 27ء-سى اسا ءىرى مولشەردە ساقتاعانى ءۇشىن، 2-ەۋى ەسىرتكىنى جارنامالاپ، ناسيحاتتاعانى ءۇشىن جاۋاپقا تارتىلدى. ۇستالعانداردىڭ اراسىندا 52 ۇل جانە 17 قىز بار.
«قۇرمەتتى اتا-انالار مەن زاڭدى وكىلدەر! مىنا جاعدايلار ءسىزدى ەرەكشە الاڭداتۋى ءتيىس: كەنەتتەن اقشا نەمەسە قىمبات زاتتاردىڭ پايدا بولۋى، تەلەفون مەن حات-حابارداعى جاسىرىندىق، ءتۇرلى نىسانداردىڭ كۇماندى سكرينشوتتارى. ەسىرتكى اينالىمىنىڭ ناقتى بەلگىلەرى — بۇل، ەڭ الدىمەن، تۇيىنشەكتەر، پاكەتتەر، يزولەنتا، ەلەكتروندى تارازى جانە وزگە دە زاتتار. ءجاسوسپىرىمنىڭ اينالاسىنا، بوس ۋاقىتىن قالاي وتكىزەتىنىنە نازار اۋدارۋ كەرەك. ونىڭ الەۋمەتتىك جەلىلەردە كىمگە جازىلعانىن، مەسسەندجەرلەردە كىممەن سەنىمدى قارىم-قاتىناستا ەكەنىن ءبىلىپ وتىرىڭىز»، — دەدى ءىىم ناشاقورلىققا قارسى ءىس-قيمىل كوميتەتى باسقارماسىنىڭ باستىعى باقىتجان ءامىرحانوۆ.