قازاقستان ىشكى ىستەر مينيسترلىگى اتا-انالارعا بالالاردى، اسىرەسە تۇنگى ۋاقىتتا، قاداعالاۋدى كۇشەيتۋگە شاقىردى. سەبەبى كوپتەگەن اتا-انا جاۋاپكەرشىلىككە تارتىلعان. بۇل تۋرالى infohub.kz سايتى حابارلايدى.
ۆەدومستۆونىڭ مالىمدەمەسىندە ەرەكشە نازار كامەلەتكە تولماعانداردىڭ تۇنگى ۋاقىتتا ەرەسەكتەرسىز ءجۇرۋ فاكتىلەرىنە اۋدارىلعان. سوڭعى جەدەل-پروفيلاكتيكالىق ءىس-شارا بارىسىندا 25 مىڭنان استام كامەلەتكە تولماعان انىقتالدى.
«اتا-انالاردىڭ نازارىن بالالاردىڭ قايدا جۇرگەنىن جانە ۋاقىتىن قالاي وتكىزەتىنىن قاداعالاۋدى كۇشەيتۋگە، سونداي-اق اتا-انالىق مىندەتتەردى تيىسىنشە ورىنداماعانى ءۇشىن جاۋاپكەرشىلىككە تارتىلاتىنىن تاعى دا ەسكەرتەمىز»، — دەلىنگەن مالىمدەمەدە.
سونىمەن قاتار ءبىلىم بەرۋ ۇيىمدارىنىڭ اينالاسىنداعى اۋماقتاردىڭ جول ينفراقۇرىلىمىن رەتكە كەلتىرۋ جۇمىستارى جۇرگىزىلدى. 3 مىڭعا جۋىق نۇسقاما شىعارىلىپ، ولاردى جويۋ بويىنشا شارالار قولدانىلۋدا.
ءىىم 40-تان استام لاۋازىمدى تۇلعانىڭ جاۋاپكەرشىلىككە تارتىلعانىن اتاپ ءوتتى. بۇدان بولەك، بالالاردى تاسىمالدايتىن اۆتوكولىك قۇرالدارىنىڭ تەحنيكالىق جاعدايى تەكسەرىلدى.
«وسى مۇمكىندىكتى پايدالانىپ، بالالاردىڭ قاۋىپسىزدىگى ءۇشىن ەڭ الدىمەن اتا-انالار جاۋاپتى ەكەنىن تاعى دا ەسكە سالامىز. بالالاردىڭ مىنەز-قۇلقىن، ەموسيونالدىق جاي-كۇيىن كۇن سايىن قاداعالاپ، العاشقى الاڭداتارلىق بەلگىلەر بايقالسا، دەرەۋ پوليسيا ورگاندارىنا حابارلاۋ ماڭىزدى. بالالار قاۋىپسىزدىگى بويىنشا پروفيلاكتيكالىق جۇمىس وقۋ ورىندارىندا دا، كوشەلەر مەن جولداردا دا جالعاسۋدا»، — دەدى ءىىم اكىمشىلىك پوليسيا كوميتەتى باسقارماسىنىڭ باستىعى اسحات دۇيسەمبەكوۆ.