قازاقستان ءىىم اكىمشىلىك پوليسيا كوميتەتى ءتوراعاسىنىڭ ورىنباسارى قۇرالاي كارينا «جول ءجۇرىسى تۋرالى» زاڭعا ەنگىزىلگەن وزگەرىستەردى ءتۇسىندىرىپ، بلوگەرلەر مەن اقپارات الاڭدارىنىڭ يەلەرىن اقپاراتتى جاۋاپكەرشىلىكپەن تاراتۋعا شاقىردى. بۇل تۋرالى infohub.kz سايتى حابارلايدى.
كارينا مەديسينالىق تەكسەرۋدەن ءوتۋ نورماسى 2014 جىلدان بەرى قولدانىستا ەكەنىن جانە بۇل جاڭا ەمەس ەكەنىن اتاپ ءوتتى. الايدا ءقازىر دەنساۋلىق ساقتاۋ مينيسترلىگى مەن ىشكى ىستەر مينيسترلىگى اراسىندا دەرەكقورلار بىرىكتىرىلدى، وسىنىڭ ارقاسىندا تەكسەرۋدەن ءوتۋ تۋرالى مالىمەتتەر ۆەدومستۆوارالىق دەڭگەيدە اۆتوماتتى تۇردە بەرىلەتىن بولادى.
اسىرەسە 65 جاستان اسقان جۇرگىزۋشىلەر مەن مۇگەدەكتىگى بار ادامدارعا قويىلاتىن تالاپتار ناقتى ءتۇسىندىرىلدى. ولار ەكى جىلدا ءبىر رەت ادەتتەگى جۇرگىزۋشى مەديسينالىق تەكسەرۋدەن ءوتۋى ءتيىس. ناتيجەلەر ءىىم جۇيەسىندە اۆتوماتتى تۇردە كورسەتىلەدى، قوسىمشا انىقتامالار نەمەسە وتىنىشتەر قاجەت ەمەس. «جۇرگىزۋشى كۋالىگىن ۇزارتۋ ءۇشىن جۇگىنۋدىڭ نەمەسە ىىم-گە بولەك حابارلاۋدىڭ قاجەتى جوق. ءبىز ازاماتتاردى تىنىشتاندىرعىمىز كەلەدى: ەشقانداي جاڭا بيۋروكراتيالىق راسىمدەر ەنگىزىلمەيدى. بارلىعى بارىنشا قاراپايىم، ىڭعايلى ءارى جۇرگىزۋشىلەر ءۇشىن ارتىق كەدەرگىلەرسىز»، – دەپ اتاپ ءوتتى ءىىم وكىلى.
سونىمەن قاتار كارينا بلوگەرلەر مەن اقپاراتتىق رەسۋرس يەلەرىنە: «بلوگەرلەر مەن اقپارات الاڭدارىنىڭ يەلەرىن جالعان اقپارات تاراتقانى ءۇشىن جاۋاپكەرشىلىككە تارتىلاتىنىن ەسكەرتىپ، بۇدان بىلاي جاريالانىمدارعا جاۋاپكەرشىلىكپەن قاراۋعا شاقىرامىز. دۇرىس ەمەس تۇسىندىرمەلەر ازاماتتاردى اداستىرۋى مۇمكىن. سوندىقتان تەك مەملەكەتتىك ورگانداردىڭ رەسمي جاريالانىمدارىن پايدالانۋدى ۇسىنامىز. ءبىز تۇسىندىرۋگە ءارقاشان اشىقپىز»، – دەدى.
ەسكە سالا كەتەيىك، 25 تامىزدا «جول ءجۇرىسى تۋرالى» زاڭعا ەنگىزىلگەن وزگەرىستەر كۇشىنە ەنەدى. بۇعان دەيىن ءىىم ولارعا تۇسىنىكتەمە بەرگەن بولاتىن.