قازاقستان ىشكى ىستەر مينيسترلىگى رەسمي مالىمدەمە جاساپ، كاسپي تەڭىزىندەگى وقۋ-جاتتىعۋ كەزىندە 14 اسكەري قىزمەتشىنىڭ قازا تابۋىنا بايلانىستى الەۋمەتتىك جەلىلەردە تاراعان بىرنەشە جالعان اقپاراتتى جوققا شىعاردى. ۆەدومستۆو سونداي-اق جالعان مالىمەت تاراتقان ازاماتتاردى جاۋاپكەرشىلىككە تارتقانىن حابارلادى، دەپ جازادى infohub.kz سايتى.
ءىىم-نىڭ رەسمي Telegram-ارناسىندا كاسپيدەگى 14 ادامنىڭ ءومىرىن قيعان قايعىلى وقيعادان كەيىن جەلىدە بەلسەندى تاراعان فەيكتەر تۋرالى مالىمدەمە جاريالاندى.
مينيسترلىكتىڭ دەرەگىنشە، د.س. جانە گ.س. ەسىمدى ازاماتشالار Facebook پاراقشالارىندا اسكەري قىزمەتشى ا.ا. تۋرالى مالىمەتتەر جاريالاعان. بۇل جازبالاردا ول ءوز بەتىنشە جاعاعا شىعىپ، سۋعا باتىپ بارا جاتقان جولداسىن قۇتقارعان، ال ونىڭ ەرلىگى مەن قۇتقارۋ جاعدايلارى ادەيى جاسىرىلىپ وتىر دەپ تۇجىرىمدالعان. تەكسەرۋ بارىسىندا د.س. بۇل اقپاراتتى الىس تۋىستارىنان العانى، ال گ.س. مالىمەتتەردى الەۋمەتتىك جەلىلەردەن كوشىرىپ الىپ، راستىعىن تەكسەرمەي ءوز پاراقشاسىندا جاريالاعانى انىقتالدى. پوليسيا اتاپ وتكەندەي، بۇل مالىمەتتەر شىندىققا سايكەس كەلمەيدى جانە قازاقستان رەسپۋبليكاسى قورعانىس مينيسترلىگى تاراپىنان رەسمي تۇردە جوققا شىعارىلعان.
ايتا كەتەيىك، بۇل رەتتە مەرزىمدى اسكەري قىزمەتتەگى ماتروستار احمەتوۆ ا.ا. جانە ماعاۋيا ءا.ا. تۋرالى قاۋەسەتتەردەن كەيىن قورعانىس مينيسترلىگى جاساعان مالىمدەمە تۋرالى ايتىلىپ وتىر. ول كەزدە قورعانىس مينيسترلىگى ولار جاعادا وقۋ مىندەتتەرىن ورىنداعان اسكەري قىزمەتشىلەر توبىنا جاتاتىنىن، ال ولارعا قاتىستى قاۋەسەتتەر فەيك ەكەنىن حابارلاعان. ءىىم قوسىمشا اقپارات رەتىندە الەۋمەتتىك جەلىلەردە تاراعان ا.ا.-نىڭ ءوز بەتىنشە جاعاعا ءجۇزىپ شىققانى، سۋعا باتىپ بارا جاتقان جولداسىن قۇتقارعانى، ال ونىڭ ەرلىگى تۋرالى اقپارات ادەيى جاسىرىلىپ وتىرعانى تۋرالى مالىمەتتەر شىندىققا سايكەس كەلمەيتىنىن قوستى.
سونىمەن قاتار، ءىىم-نىڭ مالىمەتىنشە، وقيعا تۋرالى جالعان اقپارات تاراتقان شىمكەنت تۇرعىنى س.ك. جانە كوكشەتاۋ تۇرعىنى ك.و. انىقتالدى. س.ك. Facebook پاراقشاسىندا تاعى ءبىر اسكەري قىزمەتشىنىڭ قازا تاپقانى تۋرالى جالعان مالىمەت جاريالاپ، ونىڭ تۋىستارىنا قىسىم كورسەتىلىپ، ولاردان اقشا تالاپ ەتىلىپ وتىر دەپ مالىمدەگەن. ءوز كەزەگىندە ك.و. ماڭعىستاۋ وبلىسىندا تاعى ءبىر اسكەري قىزمەتشىنىڭ قازا تاپقانى تۋرالى جالعان اقپارات جاريالاعان، دەپ قوستى ءىىم.
سوت شەشىمىمەن اتالعان ادامدار اكىمشىلىك جاۋاپكەرشىلىككە تارتىلىپ، 20 اەك (2026 جىلى 86 500 تەڭگە — رەد. ەسكەرتپەسى) مولشەرىندە ايىپپۇل سالىندى.
پوليسيا قازاقستاندىقتاردى تاعى دا ەسكەرتتى: جالعان اقپارات تاراتۋ، ونىڭ ىشىندە بوتەن ماتەريالداردى قايتا جاريالاۋ ارقىلى دا، جاۋاپكەرشىلىكتەن بوساتپايدى. «بوگدە دەرەككوزگە سىلتەمە جاساۋ ازاماتتاردىڭ قۇقىقتارى مەن زاڭدى مۇددەلەرىنە نۇقسان كەلتىرۋى مۇمكىن تەكسەرىلمەگەن مالىمەتتەردى تاراتۋعا نەگىز بولمايدى. پوليسيا الەۋمەتتىك جەلى قولدانۋشىلارىن اقپارات ورنالاستىرۋعا جاۋاپكەرشىلىكپەن قاراۋعا، تاراتىلاتىن مالىمەتتەردىڭ راستىعىن تەكسەرۋگە جانە راستالماعان اقپاراتتى جاريالاماۋعا شاقىرادى»، — دەلىنگەن مالىمدەمەدە.
ەسكە سالايىق، 24 قىركۇيەكتە وقۋ-جاۋىنگەرلىك مىندەتتى ورىنداۋ بارىسىندا اۋا رايىنىڭ كەنەتتەن كۇرت ناشارلاۋى مەن ەكپىندى جەلدىڭ سالدارىنان كاسپي تەڭىزىنە 17 اسكەري قىزمەتشىنى الىپ كەتتى، ولاردىڭ 14ء-ى قازا تاپتى. ۇشەۋى قۇتقارىلدى. قايعىلى وقيعادان كەيىن داۋرەن قوسانوۆ قورعانىس ءمينيسترى قىزمەتىنەن بوساتىلدى. ونىڭ ورنىنا ايدوس مىرزاحمەتوۆ تاعايىندالدى.