قازاقستاندا ماس كۇيدە كولىك جۇرگىزگەنى ءۇشىن جاۋاپكەرشىلىكتى جەڭىلدەتۋ بولمايدى. بۇل تۋرالى ىشكى ىستەر ءمينيسترىنىڭ ورىنباسارى يگور لەپەحا مالىمدەدى. ول قازىرگى قاتاڭ شارالاردىڭ ءوزى ءتارتىپ بۇزۋشىلاردى توقتاتپاي وتىرعانىن اتاپ ءوتتى، دەپ حابارلايدى infohub.kz سايتى.
مينيستر ورىنباسارىنىڭ ايتۋىنشا، جازانى جەڭىلدەتۋ تۋرالى اڭگىمە ماس جۇرگىزۋشىلەر سانى تۇراقتى ازايعان جاعدايدا عانا ورىندى بولار ەدى. الايدا لەپەحا كەلتىرگەن سوڭعى جىلدارداعى ستاتيستيكا كەرى ءۇردىستى كورسەتىپ وتىر.
«جاعداي كۇرت جاقسارىپ كەلە جاتىر دەسەك، وندا بىردەڭە تالقىلاۋعا بولار ەدى. مىنا ستاتيستيكانى ايتايىن. 2023 جىلى ماس كۇيدە كولىك جۇرگىزگەن 22 مىڭ جۇرگىزۋشىنى توقتاتتىق. 2024 جىلى — 24،7 مىڭ، ال 2025 جىلى — 25،3 مىڭ. ياعني ءبىز ايتىپ وتىرمىز: سونداي قورقىنىشتى شارا، ءبىراق ول ادامداردى توقتاتپايدى، ادامدار ءبارىبىر كولىك جۇرگىزە بەرەدى»، — دەدى لەپەحا.
ونىڭ دەرەگىنشە، 2026 جىلدىڭ تولىق ەمەس كەزەڭىندە پوليسيا ماس كۇيدەگى 17،1 مىڭ جۇرگىزۋشىنى انىقتاعان. مينيستر ورىنباسارى جازانى جەڭىلدەتۋ مۇنداي قۇقىق بۇزۋشىلىقتاردىڭ كوبەيۋىنە اكەلۋى مۇمكىن دەپ ەسەپتەيدى.
سونىمەن قاتار يگور لەپەحا ماس جۇرگىزۋشىلەر قاتىسقان جول-كولىك وقيعالارى تۋرالى دەرەكتەردى كەلتىردى: وتكەن جىلى وسىنداي 670 اپات بولىپ، ولاردا 56 ادام قازا تاپقان.
«ماس جۇرگىزۋشىلەر قاعىپ كەتكەن ادامداردىڭ تۋىستارىنان سۇرايىق. ولار بۇل ماسەلەلەرگە قالاي قارايدى؟ راقىمشىلىققا، قىسقارتۋعا، جەڭىلدەتۋگە؟ ءبىزدىڭ ۇستانىمىمىز وزگەرمەيدى. باس بوستاندىعىنان ايىرۋ مەرزىمىن قىسقارتۋ تۋرالى ماسەلەنى ءبىز ەشبىر جاعدايدا كوتەرمەيمىز»، — دەدى يگور لەپەحا.
بۇعان دەيىن «كۋرسيۆ» قازاقستاندا ەرەجەلەردى ۇنەمى بۇزىپ، ايىپپۇلداردى ەلەمەيتىن جۇرگىزۋشىلەرگە بالدىق جۇيە ەنگىزىلمەك ەكەنىن جازعان بولاتىن. قايتالاپ اۋىر قۇقىق بۇزۋشىلىق جاساعانداردىڭ جۇرگىزۋشى كۋالىگى ءبىر جىلعا توقتاتىلۋى مۇمكىن.