قازاقستان ىشكى ىستەر مينيسترلىگى شەكارادا جۇرگىزۋشىلەردەن اقشا بوپسالادى دەپ كۇدىكتەلگەن قىلمىستىق توپ مۇشەلەرىنىڭ ۇستالۋ ءساتىن جاريالادى، دەپ حابارلايدى infohub.kz سايتى.
اتالعان ۆەدومستۆو ۇيىمداسقان قىلمىسقا، بوپسالاۋشىلىققا جانە ازاماتتار مەن كاسىپكەرلەرگە قارسى قىلمىستىق قىسىمنىڭ وزگە دە تۇرلەرىنە قارسى جۇيەلى تۇردە كەشەندى شارالار قولدانىپ كەلەدى. قىلمىستىق توپ قۇرامىندا ارەكەت ەتەتىن ادامداردى انىقتاۋعا، قۇقىققا قارسى ارەكەتتىڭ بارلىق قاتىسۋشىسىن بەلگىلەۋگە جانە ولاردىڭ قىلمىستىق سحەمالارىن جويۋعا ەرەكشە كوڭىل بولىنەدى.
23 قىركۇيەكتە جامبىل وبلىسىنىڭ پوليسەيلەرى ۇلتتىق قاۋىپسىزدىك كوميتەتى دەپارتامەنتىمەن بىرلەسىپ، اتالعان وڭىردەگى شەكارا بەكەتىنەن وتكەن اۋىر جۇك، جولاۋشى، جەڭىل جانە ترانزيتتىك كولىك جۇرگىزۋشىلەرىنەن اقشانى جۇيەلى تۇردە بوپسالادى دەپ كۇدىكتەلگەن قىلمىستىق توپتىڭ ارەكەتىن توقتاتتى.
27 ءتىنتۋ شاراسى جۇرگىزىلدى. سۋىق قارۋ، بايلانىس قۇرىلعىلارى، ءىرى كولەمدەگى اقشا، سونداي-اق اۆتوكولىكتەر تاركىلەندى.
تەرگەۋ ادامدار توبى جاساعان بوپسالاۋشىلىق فاكتىسى بويىنشا جۇرگىزىلۋدە. قازىرگى تاڭدا قۇقىققا قارسى ارەكەتتىڭ بارلىق ءمان-جايى، وعان قاتىسۋشىلاردىڭ ءارقايسىسىنىڭ ءرولى، سونداي-اق قوسىمشا ەپيزودتار انىقتالۋدا.