قازاقستان ىشكى ىستەر مينيسترلىگى جول قوزعالىسى تۋرالى زاڭناماعا ەنگىزىلگەن جاڭا تۇزەتۋلەرگە قاتىستى تاراعان قاتە تۇسىنىكتەردى جوققا شىعارىپ، جۇرگىزۋشىلەر ءۇشىن ەشقانداي قوسىمشا بيۋروكراتيالىق راسىمدەر ەنگىزىلمەيتىنىن، كەرىسىنشە، كوپتەگەن پروسەستەر ساندىق دەرەك الماسۋ ارقىلى جەڭىلدەيتىنىن ءتۇسىندىردى، دەپ حابارلايدى infohub.kz.
ەڭ وزەكتى ماسەلەلەردىڭ ءبىرى – مىندەتتى مەديسينالىق تەكسەرۋ. ۆەدومستۆودا بۇل تالاپتىڭ جاڭالىق ەمەس ەكەنىن، ول 2014 جىلى «جول قوزعالىسى تۋرالى» زاڭ كۇشىنە ەنگەننەن بەرى قولدانىلىپ كەلە جاتقانىن ءتۇسىندىردى. ەندى دەنساۋلىق ساقتاۋ مينيسترلىگى مەن ىشكى ىستەر مينيسترلىگى اراسىندا اقپاراتتىق جۇيەلەردىڭ ينتەگراسياسى جولعا قويىلدى، سونىڭ ارقاسىندا جۇرگىزۋشىلەردىڭ مىندەتتى مەديسينالىق تەكسەرۋدەن وتكەنى تۋرالى مالىمەتتەر اۆتوماتتى تۇردە بەرىلەتىن بولادى.
«جۇرگىزۋشىلەردىڭ مەديسينالىق تەكسەرۋدەن ءوتۋ نورماسى جاڭا ەمەس. ول 2014 جىلدان باستاپ „جول قوزعالىسى تۋرالى" زاڭ كۇشىنە ەنگەننەن بەرى قولدانىلىپ كەلەدى. دەنساۋلىق ساقتاۋ مينيسترلىگى مەن ىشكى ىستەر مينيسترلىگى اراسىندا دەرەكقورلار ينتەگراسياسى جۇرگىزىلدى»، — دەدى ءىىم اكىمشىلىك پوليسيا كوميتەتى ءتوراعاسىنىڭ ورىنباسارى كۇرالاي كارينا.
65 جاستان اسقان جۇرگىزۋشىلەر مەن مۇگەدەكتىگى بار ازاماتتارعا قاتىستى جاعداي جەكە ءتۇسىندىرىلدى. ولارعا ەكى جىلدا ءبىر رەت ستاندارتتى جۇرگىزۋشىلىك مەديسينالىق تەكسەرۋدەن ءوتۋ جەتكىلىكتى. وسىدان كەيىن اقپارات ءىىم جۇيەسىندە اۆتوماتتى تۇردە كورىنىس تابادى. قوسىمشا انىقتامالار، مەكەمەلەرگە جۇگىنۋ نەمەسە پوليسياعا جەكە حابارلاۋدىڭ قاجەتى جوق.
«ەشقانداي جاڭا بيۋروكراتيالىق راسىمدەر ەنگىزىلمەيدى. بارلىعى بارىنشا قاراپايىم، ىڭعايلى جانە جۇرگىزۋشىلەرگە ەش قيىندىق تۋدىرمايدى»، — دەپ اتاپ ءوتتى ءىىم وكىلى.
ۆەدومستۆو سونداي-اق الەۋمەتتىك جەلىلەردىڭ پايدالانۋشىلارى مەن اقپاراتتىق الاڭداردىڭ يەلەرىنە اقپاراتتى جاريالاماس بۇرىن تەكسەرۋدى سۇراپ، ازاماتتاردى جاڭىلىستىراتىن جالعان اقپارات تاراتقانى ءۇشىن جاۋاپكەرشىلىك تۋرالى ەسكەرتتى.