وڭتۇستىك كورەياداعى ينچحون اۋەجايى تاريحتا العاش رەت حالىقارالىق جولاۋشىلار اعىنى بويىنشا الەمدىك رەيتينگتە كوش باستاپ، لوندونداعى حيتروۋدى ارتتا قالدىردى، دەپ حابارلايدى infohub.kz.
حالىقارالىق اۋەجايلار كەڭەسىنىڭ الدىن الا دەرەكتەرىنە سايكەس، 2026 جىلدىڭ العاشقى التى ايىندا ينچحون 38،39 ميلليون حالىقارالىق جولاۋشىعا قىزمەت كورسەتكەن. بۇل وعان ءبىرىنشى ورىنعا شىعۋعا مۇمكىندىك بەردى، ال حيتروۋ 37،79 ميلليون كورسەتكىشپەن ەكىنشى، سينگاپۋرداعى چانگي ءۇشىنشى ورىندا تۇر.
ينچحوننىڭ جولاۋشىلار اعىنى وتكەن جىلدىڭ سايكەس كەزەڭىمەن سالىستىرعاندا 6،3 پايىزعا وسكەن. بۇعان ترانزيتتىك ساياحاتشىلاردىڭ ايتارلىقتاي كەلۋى سەبەپ بولدى: ولاردىڭ سانى 18،1 پايىزعا ارتىپ، 4،24 ميلليون ادامعا جەتكەن. ساراپشىلار مۇنداي سەرپىندى ەۋروپالىق جانە ازيالىق باعىتتاردىڭ ءبىر بولىگىنىڭ تاياۋ شىعىستاعى توراپتاردى اينالىپ وتۋىمەن، سونداي-اق جۇڭگو مەن جاپونيادان كەلەتىن تۋريستەر اعىنىنىڭ ارتۋىمەن بايلانىستىرادى.
اۋەجايدى باسقاراتىن كومپانيا وكىلدەرى رەكوردتىق ناتيجەلەر ينفراقۇرىلىمدى كەڭەيتۋدىڭ ءتورتىنشى كەزەڭىنىڭ اياقتالۋىنىڭ ارقاسىندا مۇمكىن بولعانىن، بۇل كەشەننىڭ وتكىزۋ قابىلەتىن جىلىنا 106 ميلليون ادامعا دەيىن ارتتىرعانىن مالىمدەدى. قازىرگى ۋاقىتتا ينچحون اۋەجايى الەمنىڭ 53 ەلىندەگى 183 قالانى بايلانىستىرادى.