Үндістанда жолаушылар пойызы жүріп бара жатқанда өртенді: жалын бірнеше вагонды толық құртып, зардап шеккендер туралы дерек әзірге түскен жоқ, деп хабарлайды infohub.kz сайты.
The Times of India мәліметінше, өрт Karmabhoomi Express пойызында тұтанған, салдарынан үш вагон толық жанып кетті. Оқиға Пенджаб штатындағы Патиала округіне қарасты Сараи Банджара елді мекенінің маңында болған.
Өрт шамамен 13:00-де басталып, жолаушылар арасында дүрбелең тудырды, өйткені жалын бір вагоннан көршілес екі вагонға тараған. Оқиға орнынан түсірілген кадрларда пойыз вагондары толық өртенгені көрінеді.
Times Now хабарлауынша, пойыз Амритсардан Нью-Джалпайгуриге қарай келе жатқан; өрт пен қою түтін вагондарды қаптап, жолаушыларды эвакуациялауға мәжбүр етті.
Теміржол полиция бөлімшесінің бастығы Гурприт Сингхтың айтуынша, өрттің себебі вагондардың біріндегі желдеткіштегі қысқа тұйықталу болуы мүмкін. Өрт бір вагонда тұтанып, кейін көрші вагондарға тарағаны хабарланды. Оқиға орнына теміржол қызметкерлері мен жедел қызметтер келіп, жағдайды бақылауға алды. Қазіргі таңда зардап шеккендер туралы ақпарат түскен жоқ.
Оқиғадан кейін теміржол қызметтері жолаушыларды басқа пойызға отырғызуды ұйымдастыруға кірісті, олар сапарын жалғастыра алады. Залал көлемі туралы мәліметтер нақтылануда.
Бұған дейін Испанияда пойыздар соқтығысқан. 60-тан астам адамның қаза тапқаны хабарланған. Қазақстан Сыртқы істер министрлігі Испаниядағы теміржол апатына қатысты пікір білдірді. Елде үш күндік аза тұту жарияланды. Біз Испанияда теміржол апатында 70-ке жуық адамның қаза табуынан кейін көлік министрінің отставкасы талап етілгенін жазғанбыз. Апаттан кейін ондаған адам із-түзсіз жоғалды.