ءۇندىستاننىڭ سولتۇستىك-شىعىسىنداعى سيككيم شتاتىندا سالىنىپ جاتقان گيدروەلەكتر ستانسياسىندا گاز جارىلىپ، كەمىندە 20 ادام قازا تاپتى. بۇل تۋرالى infohub.kz حابارلادى.
سيككيم شتاتى توتەنشە جاعدايلار باسقارماسىنىڭ ديرەكتورى رادجيۆ روكانىڭ ايتۋىنشا، قيراعان تۋننەلدەن 25 ادامنىڭ 13ء-ىنىڭ ءمايىتى تابىلدى. تاعى جەتى-سەگىز ءمايىت ىشىندە قالىپ، ولاردى ازىرگە الىپ شىعۋ مۇمكىن بولماي وتىر. «جاعدايعا قاراپ، امان قالعاندار بولۋى ەكىتالاي»، — دەدى روكا. قۇتقارۋ جۇمىستارىنا تۋننەلدىڭ سۋعا تولۋى مەن جەر استى جىنىستارىنان مەتان گازىنىڭ ءبولىنۋى كەدەرگى كەلتىرۋدە.
مەملەكەتتىك ۇلتتىق گيدروەلەكتر كورپوراسياسى (ۇگك) 500 مەگاۆاتتتىق جوبانىڭ تۋننەلىنىڭ وپىرىلۋىنا جەر قىرتىسىنداعى مەتان گازىنىڭ «جارىلىس تۇرىندە ءبولىنۋى» سەبەپ بولعانىن، بۇل ءتۇتىن مەن ۋلى گازدىڭ پايدا بولۋىنا اكەلگەنىن مالىمدەدى. كورپوراسيا اپاتتىڭ ءمان-جايىن انىقتاۋ ءۇشىن تەرگەۋ باستالاتىنىن حابارلادى. ايماقتا سوڭعى كۇندەرى نوسەر جاۋىپ، قالپىنا كەلتىرۋ جۇمىستارىن قيىنداتىپ جاتىر.
ءۇندىستاندا ءىرى ينفراقۇرىلىم نىساندارىندا اپاتتار ءجيى كەزدەسەدى. ەكولوگتاردىڭ پىكىرىنشە، گيمالايدىڭ ەكولوگيالىق وسال ايماعىندا قۇرىلىس جوبالارىنىڭ كوبەيۋى اپاتتار سانىن ارتتىرعان. مۇندا تەكتونيكالىق بەلسەندىلىك پەن تۇراقسىز جىنىس قاباتتارى تۋننەل سالۋدى ەرەكشە ءقاۋىپتى ەتەدى. 2023 جىلى ۋتتاراكحاند شتاتىنداعى گيمالاي جول تۋننەلى وپىرىلىپ، 41 جۇمىسشى 17 كۇن بويى قامالىپ، كەيىن قۇتقارىلعان بولاتىن.