يندونەزيانىڭ ياۆا تەڭىزىندە جولاۋشى كەمەسى اۋدارىلىپ كەتكەن سوڭ، قۇتقارۋشىلار 130 ادامدى ىزدەستىرىپ جاتىر. 113 ادام ءقاۋىپسىز جەرگە شىعارىلدى، التاۋى قازا تاپتى دەپ حابارلادى ەلدىڭ ىزدەستىرۋ-قۇتقارۋ قىزمەتى، دەپ جازادى infohub.kz سايتى.
جەكسەنبى كۇنى تاڭەرتەڭ اۋا رايى ناشارلاعان كەزدە بيلىكپەن بايلانىسىن جوعالتقان «Virgo Transport 8» كەمەسىندە 243 ادام، ونىڭ ىشىندە 30 ەكيپاج مۇشەسى بولعان. كەمە سەنبى كۇنى شىعىس ياۆاداعى سۋرابايا قالاسىنان وڭتۇستىك كاليمانتانداعى بانجارماسين قالاسىنا قاراي جول تارتقان.
جەكسەنبى كۇنى تۇستەن كەيىن قۇتقارۋ قىزمەتى 107 ادامنىڭ امان قالعانىن، ال 130 ادامنىڭ ءالى دە ىزدەستىرىلىپ جاتقانىن مالىمدەدى. التاۋى قازا تاپقانى راستالدى.
يندونەزيانىڭ كولىك ءمينيسترى دۋدي پۋرۆاگاندحي ءباسپاسوز ءماسليحاتىندا كەمەنىڭ سۋعا باتپاعانىن، كەرىسىنشە اۋدارىلىپ كەتكەنىن ايتتى. ول تىكۇشاق ەكيپاجىنىڭ باقىلاۋلارىنا سىلتەمە جاساپ، وقيعانىڭ سەبەبى قوسىمشا تەرگەۋدى قاجەت ەتەتىنىن قوستى. بۇعان دەيىن ىزدەستىرۋ-قۇتقارۋ قىزمەتى كەمە سۋعا باتتى دەپ مالىمدەگەن بولاتىن.
قۇتقارۋ قىزمەتىنىڭ بانجارماسين بولىمشەسىنىڭ باسشىسى ي پۋتۋ سۋدايانا بەينەجازبا مالىمدەمەسىندە قۇتقارىلعاندار ءتۇرلى كەمەلەرمەن تاسىمالدانعانىن، ولاردىڭ ءبىر بولىگى شىعىس ياۆا پورتىنا جەتكىزىلەتىنىن ايتتى. ونىڭ سوزىنشە، قۇتقارۋشىلار كەمەنىڭ سوڭعى بەلگىلى ورنىنا توپ، كەمەلەر مەن تىكۇشاق جىبەرىپ، ىزدەستىرۋ جۇمىستارىن باستاعان.
17 مىڭ ارالدان تۇراتىن يندونەزيا قاتىناستا پارومدارعا قاتتى تاۋەلدى: تەڭىز جولدارى اۋە قاتىناسىنا قاراعاندا ارزان ءارى قولجەتىمدى. الايدا قاۋىپسىزدىك تالاپتارى ءاردايىم قاتاڭ ساقتالا بەرمەيتىندىكتەن، اپاتتار جيىرەك بولادى.