يندونەزيانىڭ 17 جاستاعى تۇرعىنى رۋديانسا بورنەو ارالىنداعى ورمان ورتتەرىن سوندىرۋگە كومەكتەسىپ، ورتپەن سۋپەرمەن كوستيۋمىمەن كۇرەسەدى. جاس سۋپەرقاھارماننىڭ بەينەجازبالارى الەۋمەتتىك جەلىلەردە ميلليونداعان كورىلىم جينادى، دەپ حابارلايدى infohub.kz.
رۋديانسا اكەسى ۇيىمداستىرعان ەرىكتى ءورت ءسوندىرۋ توبىنا قوسىلدى. ءبىر كۇنى ءجاسوسپىرىم اكەسىنىڭ ءورت سوندىرۋگە دايىندالىپ جاتقانىن كورىپ، ونىمەن بىرگە بارۋدى ۇيعاردى. ەندى ولار بىرگە پالانگكاراي ايماعىنداعى تۇتىندەگەن باتپاقتار مەن جانعان وسىمدىكتەر اراسىندا جۇمىس ىستەيدى. ءجاسوسپىرىم شىققاندا ءوزىنىڭ سۇيىكتى سۋپەرقاھارمانى سۋپەرمەننىڭ كوستيۋمىن كيەدى، ءدال وسى كيىمدە ول الەۋمەتتىك جەلىلەرگە تاراعان بەينەجازباعا تۇسكەن.
رۋديانسانىڭ ايتۋىنشا، ول جەرگىلىكتى تۇرعىندارعا كومەكتەسكەنىنە قۋانىشتى. بولاشاقتا ءجاسوسپىرىم ورمان رەيندجەرى بولۋدى ارماندايدى، ال ءقازىر باسقا ءورت سوندىرۋشىلەر مەن ەرىكتىلەردى ورتپەن كۇرەستى جالعاستىرۋعا شاقىرادى.
رۋديانسانىڭ جانعان ورمانعا شلانگپەن سۋ بۇركىپ جاتقان بەينەجازباسى الەۋمەتتىك جەلىلەردە تەز تاراپ، ميلليونداعان كورىلىم جينادى. ءتىپتى يندونەزيانىڭ ورمان شارۋاشىلىعى ءمينيسترى جاسوسپىرىمگە نازار اۋدارىپ، ونى «ورمان قاھارمانى» دەپ اتادى.
جىگىتتىڭ اكەسىنىڭ ايتۋىنشا، بيىلعى ماۋسىم توپ قۇرىلعان 2020 جىلدان بەرگى ەڭ اۋىر ماۋسىم بولدى. اسىرەسە سۋ ماسەلەسى وتكىر تۇر: قۋاڭشىلىققا بايلانىستى ەرىكتىلەر پايدالاناتىن قۇدىقتار مەن باسقا دا سۋ كوزدەرى تارتىلىپ قالدى.
قاڭتاردان شىلدەگە دەيىن يندونەزياداعى ءورت 200 مىڭ گەكتاردان استام جەردى جويدى. بۇل دجاكارتا اۋماعىنان شامامەن ءۇش ەسە ۇلكەن. ەل بيلىگى ءورتتىڭ تارالۋىمەن كۇرەسۋ ءۇشىن قوسىمشا كۇش پەن اۆياسيانى جۇمىلدىردى.
ءتۇتىن يندونەزيا مالايزيا جانە برۋنەيمەن بولىسەتىن بورنەونىڭ ءبىر بولىگىن جاۋىپ تاستادى. ال ەل-نينو قۇبىلىسىنا بايلانىستى قۋاڭشىلىق جاڭا ورتتەردىڭ شىعۋ ءقاۋپىن ارتتىرىپ، ولاردى توقتاتۋعا تىرىسقانداردىڭ جۇمىسىن قيىنداتادى.