ۇلتتىق ەكونوميكا ءمينيسترى سەرىك جۇمانعارين ۇكىمەت وتىرىسىندا ەلدىڭ 2027-2029 جىلدارعا ارنالعان الەۋمەتتىك-ەكونوميكالىق دامۋ بولجامىن تانىستىردى، دەپ حابارلايدى infohub.kz سايتى.
ۇەم باسشىسى بولجام الەمدىك ەكونوميكانىڭ دامۋ پەرسپەكتيۆالارى مەن سىرتقى نارىقتارداعى كونيۋنكتۋرانى ەسكەرە وتىرىپ جاسالعانىن اتاپ ءوتتى. ونىڭ ايتۋىنشا، سىرتقى قيىندىقتار ساقتالعانىمەن، قازاقستان ەكونوميكاسى ءوسۋىن جالعاستىرادى. نەگىزگى سەناري بويىنشا، 2027-2029 جىلدارى ءجىو-نىڭ ورتاشا جىلدىق ناقتى ءوسىمى 5%-دان جوعارى دەڭگەيدە بولجانۋدا. نومينالدى ءجىو 2027 جىلى 199،3 ترلن تەڭگەدەن 2029 جىلى 245 ترلن تەڭگەگە دەيىن وسەدى.
ەكونوميكانىڭ ءوسۋى مۇناي ەمەس سەكتورلارداعى ءوندىرىستىڭ ۇلعايۋىمەن قامتاماسىز ەتىلەدى. ينفلياسيانىڭ بولجامدى ءدالىزى 2027 جىلى 7،5-9،5%، 2028-2029 جىلدارى 6-8% دەڭگەيىندە بەلگىلەندى. ماكروبولجامدى ەسكەرە وتىرىپ، رەسپۋبليكالىق بيۋدجەتتىڭ كىرىستەرى 2027 جىلى 19،9 ترلن تەڭگەنى، 2028 جىلى 21،7 ترلن تەڭگەنى، 2029 جىلى 23،4 ترلن تەڭگەنى قۇرايدى دەپ كۇتىلۋدە.
مەملەكەتتىك قارجىنىڭ تۇراقتىلىعىن قامتاماسىز ەتۋ ءۇشىن بيۋدجەت تاپشىلىعى 2027 جىلى جىو-گە شاققاندا 2،3% دەڭگەيىندە بەلگىلەنىپ، 2029 جىلى ءجىو-نىڭ 0،4%-ىنا دەيىن تومەندەيدى. مۇناي ەمەس تاپشىلىق ءجىو-نىڭ 5،3%-ىنان 2،5%-ىنا دەيىن قىسقارادى، دەپ اتاپ ءوتتى جۇمانعارين.