قارجى كەڭەسشىسى ءالي امانبايەۆ ءوز ارناسىندا قازاقستاندىق 10 جىلدا زەينەتكە شىققانشا $566 مىڭ جيناي الاتىنىن ايتتى، دەپ حابارلايدى infohub.kz سايتى.
ساراپشىنىڭ ايتۋىنشا، ينۆەستيسيانى ەرتە باستاۋدىڭ ماڭىزى زور. ەگەر 25 جاستا اي سايىن $400-دى الەمدىك اكسيالار پورتفەلىنە سالىپ، مۇنى 10 جىل عانا جاساسا، 65 جاسقا قاراي پورتفەل قۇنى $566 مىڭعا دەيىن ءوسۋى مۇمكىن.
امانبايەۆ بولاشاق تابىس ءۇشىن ەرتە باستاۋدىڭ ماڭىزدىلىعىن اتاپ ءوتتى. العاشقى جىلدارى الىنعان تابىس كۇردەلى پايىز اسەرىنىڭ ارقاسىندا ءوزى جاڭا تابىس اكەلە باستايدى. سوندىقتان مۇنداي ينۆەستيسيالاردىڭ تابىستىلىعى كەشىرەك باستالعان سالىمدارعا قاراعاندا جوعارى بولادى.
ساراپشى مىسال رەتىندە زەينەتكە اقشا جينايتىن ءۇش ينۆەستوردىڭ نۇسقاسىن كەلتىردى. ولاردىڭ ءارقايسىسى اي سايىن $400-دى الەمدىك اكسيالار پورتفەلىنە، مىسالى، S&P 500 يندەكسىنە سالادى. نومينالدى تابىستىلىق 10،5% بولعاندا، ينفلياسيانى ەسكەرگەندەگى ناقتى تابىستىلىق جىلىنا 7،25% قۇرايدى.
ەگەر 25 جاستان باستاپ اي سايىن $400-دى 65 جاسقا دەيىن سالسا، 40 جىلدا ينۆەستور $192 مىڭ سالادى، ال 65 جاستا پورتفەل قۇنى $1 ملن-عا دەيىن وسەدى.
ەگەر سول قاراجاتتى 25-تەن 35 جاسقا دەيىن، ياعني 10 جىل بويى سالسا، ينۆەستور $48 مىڭ سالادى، ءبىراق 65 جاستا ونىڭ اكسيالارداعى جيناعى $565،9 مىڭعا دەيىن ءوسۋى مۇمكىن.
ال ەگەر ينۆەستيسيانى 10 جىل كەشىگىپ – 35 جاستا – باستاپ، 65 جاسقا دەيىن اي سايىن سالسا، جالپى سالىم سوماسى $144 مىڭ بولعاندا، جيناق تەك $489،9 مىڭعا دەيىن ارتادى.
امانبايەۆ وسىلايشا ءۇش ەسە از اقشا سالىپ، 30 جىل بۇرىن ينۆەستيسيالاۋدى توقتاتقان ادام تاعى ءۇش ونجىلدىق بويى ينۆەستيسيالاۋدى جالعاستىرعان ادامنان باسىم تۇسەتىنىن اتاپ ءوتتى.
«25-تە باستاۋ» مەن «35-تە باستاۋ» اراسىنداعى ايىرماشىلىق – 10 جىل ەمەس. بۇل بىردەي تابىستىلىق كەزىندە قورىتىندى كاپيتالداعى ەكى ەسەدەن استام ايىرماشىلىق. بىردەن ۇلكەن سوما سالۋ مىندەتتى ەمەس. الدەقايدا ماڭىزدىسى – بارىنشا ەرتە باستاۋ، ويتكەنى جوعالعان ۋاقىتتى كەيىن الدەقايدا ۇلكەن جارنالارمەن وتەۋگە تۋرا كەلەدى»، – دەدى كەڭەسشى.
ساراپشى تابىس جوعارىلاعانشا كۇتپەي، ينۆەستيسيانى بارىنشا ەرتە باستاۋعا شاقىردى، سەبەبى وسى جىلدارداعى تابىستىلىقتى جيناقتاۋ اسەرىن قايتارۋ مۇمكىن ەمەس.