قازاقستاندا يپوتەكالىق تۇرعىن ءۇي قارىزدارىن قايتا قارجىلاندىرۋ باعدارلاماسى جالعاسۋدا. ول جىلدىق 3%-دان اسپايتىن مولشەرلەمەنى، سىياقى جانە ءوسىمپۇل بويىنشا بەرەشەكتى ەسەپتەن شىعارۋدى، سونداي-اق الەۋمەتتىك وسال قارىز الۋشىلارعا قوسىمشا قولداۋ شارالارىن كوزدەيدى. بۇل تۋرالى قارجى نارىعىن رەتتەۋ جانە دامىتۋ اگەنتتىگىنىڭ وكىلدەرى الماتىداعى بريفينگتە ايتتى، دەپ حابارلايدى infohub.kz.
باعدارلاما اياسىندا 2016 جىلعى 1 قاڭتارعا دەيىن بەرىلگەن ۆاليۋتالىق يپوتەكالىق قارىزدار 188،35 تەڭگە بەكىتىلگەن باعاممەن تەڭگەگە اۋىستىرىلادى. الەۋمەتتىك وسال قارىز الۋشىلار ءۇشىن بۇرىن قايتا قارجىلاندىرىلعان نەسيەلەر بويىنشا بەرەشەكتى تولىق نەمەسە ءىشىنارا ەسەپتەن شىعارۋ، سونداي-اق بۇرىن بانك بالانسىنا وتكەن جالعىز تۇرعىن ءۇيدى قايتارۋ مۇمكىندىگى قاراستىرىلعان.
اگەنتتىكتىڭ دەرەگىنشە، رەۆولۆەرلىك مەحانيزمنىڭ ارقاسىندا كورسەتىلگەن قولداۋدىڭ جالپى كولەمى 678 ملرد تەڭگەگە جەتتى. شامامەن 60 مىڭ يپوتەكالىق قارىز الۋشى كومەك الدى. 90 كۇننەن استام مەرزىمى وتكەن يپوتەكالىق قارىزداردىڭ ۇلەسى 2015 جىلعى 30%-دان 2026 جىلعى 1 ماۋسىمداعى جاعداي بويىنشا 0،6%-عا دەيىن تومەندەدى.
سونىمەن قاتار، 2026 جىلعى 1 شىلدەدەن باستاپ قازاقستاندا بەرەشەكتى ۇجىمدىق رەتتەۋدىڭ ءبىرىڭعاي سيفرلىق پلاتفورماسى – finkelisim.kz جۇمىس ىستەيدى. قىزمەت «ءبىر تەرەزە» قاعيداتى بويىنشا جۇمىس ىستەيدى جانە قارىز الۋشىلارعا بىرنەشە كرەديتور الدىنداعى مىندەتتەمەلەرىن ءبىر ۋاقىتتا رەتتەۋگە مۇمكىندىك بەرەدى. ءوتىنىش بەرىلگەننەن كەيىن جۇيە قارىز الۋشىنىڭ تالاپتارعا سايكەستىگىن تەكسەرەدى، نەسيەلەر ءتىزىمىن قالىپتاستىرادى جانە دەرەكتەردى كرەديتورلارعا جىبەرەدى. شارتتار كەلىسىلگەننەن كەيىن ازامات ءبىرىڭعاي قۇجاتتار پاكەتىنە قول قويادى، ال كرەديتورلار بەرەشەكتى ءوندىرىپ الۋ شارالارىن توقتاتا تۇرادى.
پلاتفورمانىڭ باستى ارتىقشىلىعى – كرەديتورلار ادامنىڭ جالپى قارىز جۇكتەمەسىن باعالايدى، ءار نەسيەنى جەكە ەمەس. ءراسىمدى قولدانا الاتىندار – كەپىلسىز تۇتىنۋ نەسيەلەرى بويىنشا ەكى جانە ودان دا كوپ كرەديتور الدىندا 90 كۇننەن استام مەرزىمى وتكەن ازاماتتار. الەۋمەتتىك وسال ازاماتتار ءۇشىن اي سايىنعى تولەمدەر تومەندەتىلىپ، وتەۋ مەرزىمدەرى ۇزارتىلعان. ءبىرىنشى كەزەڭدە پلاتفورمانىڭ الەۋەتتى قاتىسۋشىلارى شامامەن 350 مىڭ پروبلەمالىق قارىز الۋشى بولا الادى.