يران يوردانياداعى ال-ازراك اۋە بازاسىنا شابۋىل جاسادى. سالدارىنان ەكى امەريكاندىق اسكەري قىزمەتكەر قازا تاپتى، تاعى بىرنەشەۋى جارالاندى. بۇل تۋرالى infohub.kz سايتى حابارلادى.
اقش قارۋلى كۇشتەرىنىڭ ورتالىق قولباسشىلىعىنىڭ (CENTCOM) مالىمەتىنشە، شابۋىل 17 شىلدەدە بالليستيكالىق زىمىراندار مەن ۇشقىشسىز ۇشۋ اپپاراتتارىمەن جاسالدى. ەكى قازا تاپقاننان بولەك، ءبىر اسكەري حابار-وشارسىز كەتتى. ءتورت جاراقاتتانعان يوردانيا اۋرۋحانالارىنا جەتكىزىلسە، جەڭىل جارالانعان بىرنەشە اسكەري قىزمەتكەر قايتادان قىزمەتكە ورالدى.
وسى وقيعادان كەيىن اقش اسكەرىنىڭ يرانمەن قاقتىعىستاعى راستالعان شىعىنى 16 ادامعا جەتتى.
شابۋىلدىڭ نىسانى ال-ازراك اۋە بازاسى بولدى. The Wall Street Journal گازەتىنىڭ حابارلاۋىنشا، امەريكاندىق كۇشتەر بۇل بازانى ايماقتاعى وپەراسيالار ءۇشىن پايدالانعان. بۇعان دەيىن يران يسلام رەۆوليۋسياسى ساقشىلارى كورپۋسى بازاداعى بىرنەشە امەريكاندىق ۇشاقتى جويعانىن مالىمدەگەن ەدى.
اقش پرەزيدەنتى دونالد ترامپ قازا تاپقانداردىڭ وتباسىنا كوڭىل ايتىپ، ولاردىڭ قازاسىن ەل ءۇشىن اۋىر جوعالتۋ دەپ اتادى. پەنتاگون باسشىسى پيت حەگسەت بولعان وقيعا اقش-تىڭ اسكەري ارەكەتتەردى جالعاستىرۋعا دەگەن بەلسەندىلىگىن كۇشەيتە تۇسەتىنىن ايتتى.
ۆاشينگتون مەن تەگەران اراسىنداعى شيەلەنىس سوعىس قيمىلدارىن توقتاتۋ تۋرالى كەلىسىمدەردىڭ بۇزىلۋىنان كەيىن تۋىندادى. بۇرىن قول جەتكىزىلگەن كەلىسىمدەرگە قاراماستان، ورمۋز بۇعازى ماڭىنداعى كەيىنگى شابۋىلدار جاڭا سوققىلارعا جانە قاراما-قايشىلىقتىڭ كۇشەيۋىنە اكەلدى.
ترامپ بۇعان دەيىن يرانمەن كەلىسىمنىڭ ەندى كۇشىندە جوق ەكەنىن، ال ەلگە قارسى اسكەري وپەراسيالار بەلگىلەنگەن ماقساتتارعا جەتكەنشە جالعاساتىنىن اتاپ ءوتتى.