يران باس كوسەمىنىڭ اسكەري كەڭەسشىسى موسەن رەزاي اقش-پەن قاقتىعىستا قورعانىستان شابۋىلعا كوشۋگە نيەتتى ەكەنىن ايتتى، دەپ حابارلايدى infohub.kz.
تەگەران الداعى ەكى-ۇش كۇندە ۆاشينگتون سوققىلاردى توقتاتپاسا، قارقىندى شابۋىلدار بولاتىنىن ەسكەرتەدى.
«اقش شابۋىلدارى الداعى ەكى-ۇش كۇندە جالعاسسا، يران يسلام رەسپۋبليكاسىنىڭ قارۋلى كۇشتەرى تەجەۋ مەن جاۋاپ قايتارۋ كەزەڭىنەن شابۋىل جانە تولىق جويىلۋ فازاسىنا كوشەدى»، — دەدى رەزاي يران تەلەديدارىنىڭ ەفيرىندە.
ول مۇنداي جاعدايدا يراننان تىس جەردەگى امەريكالىق اسكەري بازالار مەن ساربازدار تىكەلەي نىساناعا اينالاتىنىن اتاپ ءوتتى.
«يراننىڭ وسى ۋاقىتقا دەيىن توزىمدىلىك تانىتۋىنىڭ سەبەبى — قاۋىپسىزدىك ماسەلەلەرى مەن حالىقارالىق قاقتىعىستاردىڭ (مىسالى، تۇرىك-يزرايل، قىتاي-تايۆان جانە رەسەي-ەۋروپا داعدارىستارى) ورشۋىنە جول بەرمەۋ ەدى، ءبىراق ۆاشينگتوننىڭ جاڭا قاتەلىگى ايماقتى ءدال سول باعىتقا اپارىپ وتىر»، — دەپ قوستى كەڭەسشى.
رەزاي اقش اكىمشىلىگى سوققىلار مەن كەلىسسوزدەردى الماستىراتىن ستراتەگيانىڭ جويقىندىعىن ءتۇسىنۋى كەرەك دەپ سانايدى.
ەسكە سالايىق، اقش پەن يران اراسىنداعى سوققى الماسۋ ءبىر اپتادان استام بۇرىن، انكاراداعى ناتو ءسامميتى قارساڭىندا باستالعان ەدى.
كەيىن اق ءۇيدىڭ باسشىسى اتىستى توقتاتۋ رەجيمى اياقتالعانىن، الايدا ۆاشينگتون كەلىسسوزدەرگە دايىن ەكەنىن مالىمدەدى. ال يران سىرتقى ىستەر ءمينيسترىنىڭ ورىنباسارى كازەم گاريبابادي اقش-پەن بەيبىت كەلىسىم شارتىنىڭ كۇشىن جويعانىن اتاپ ءوتتى.