تەگەران دەلدالدار ارقىلى ۆاشينگتونعا جەتى قاتاڭ تالاپتىڭ ءتىزىمىن جولدادى. ولار ورىندالعان جاعدايدا عانا ورمۋز بۇعازىندا كەمە قاتىناسى قايتا جاندانادى. بۇل تۋرالى Tasnim اگەنتتىگى حابارلادى، دەپ جازادى infohub.kz.
باسىلىم دەرەگىنشە، اقش بۇعازدى اشۋدى تالاپ ەتىپ وتىرسا دا، وڭتۇستىك باعىت ءالى كۇنگە دەيىن جابىق تۇر. سونىمەن قاتار يران مەن ومان بۇعازداعى جاڭا باعىتتاردىڭ ەگجەي-تەگجەيىن كەلىسىپ العانى بەلگىلى بولدى.
قويىلعان تالاپتاردىڭ نەگىزى بۇرىن يران قاۋىپسىزدىك كەڭەسى تۇجىرىمداعان قاعيداتتار بولدى. تەگەراننىڭ نەگىزگى شارتتارى مىناداي:
اقش پەن ونىڭ وداقتاستارى تاراپىنان اسكەري قاۋىپ-قاتەردىڭ توقتاتىلۋى.
ايماقتاعى سوعىس پەن كەز كەلگەن اگرەسسيا ارەكەتتەرىنىڭ توقتاتىلۋى.
يران پورتتارىنا سالىنعان تەڭىز بلوكاداسىنىڭ تولىق الىنۋى.
يرانعا قارسى ەنگىزىلگەن سانكسيالاردىڭ تولىق جويىلۋى.
شەتەلدە بۇعاتتالعان يران اكتيۆتەرىنىڭ بارلىعىنىڭ قايتارىلۋى.
ەل ەكونوميكاسى مەن ينفراقۇرىلىمىنا كەلتىرىلگەن زياننىڭ وتەلۋى.
اقش شابۋىلدارىنىڭ توقتاتىلۋى جانە تەگەران مۇددەسى ەسكەرىلگەن كەمە قاتىناسى قاۋىپسىزدىگىنىڭ كەپىلدىگى.
يران وكىلدەرى ومانمەن بىرلەسكەن باعىت پەن ۋاقىتشا ءدالىز قۇرۋ تۋرالى كەلىسىمنىڭ تەك ءىشىنارا شەشىم ەكەنىن، ول بۇعازدىڭ اۆتوماتتى تۇردە اشىلاتىنىن بىلدىرمەيتىنىن ايرىقشا اتاپ ءوتتى. ەندى كەمە قاتىناسىنىڭ تولىق قالپىنا كەلۋى ۆاشينگتوننىڭ جەڭىلدىككە بارۋعا جانە يران تالاپتارىن ورىنداۋعا دايىندىعىنا تىكەلەي بايلانىستى.
ايتا كەتەيىك، 6 قىركۇيەكتە يسلام رەسپۋبليكاسى جوعارى ۇلتتىق قاۋىپسىزدىك كەڭەسىنىڭ حاتشىسى موحسەن رەزاي ورمۋز بۇعازى كەمە قاتىناسى ءۇشىن تولىق جابىلعانىن مالىمدەگەن ەدى.
بۇعان دەيىن «كۋرسيۆ» اقش پرەزيدەنتى دونالد ترامپتىڭ يرانمەن سوعىس قاشان اياقتالاتىنىن ايتقانىن جازعان بولاتىن.