يران اقش-قا قارسى جاۋاپ وپەراسياسىن باستاپ، باحرەين مەن كۋۆەيتتەگى اقش اسكەري بازالارىنا سوققى بەرگەنىن مالىمدەدى، دەپ حابارلايدى infohub.kz.
يران قارۋلى كۇشتەرى زىمىراندار مەن ۇشقىشسىز ۇشاقتاردى پايدالانىپ، باحرەيندەگى شەيح يسا جانە كۋۆەيتتەگى ءالي اس-سالەم امەريكا بازالارىنا شابۋىل جاسادى. سوققىلار ناتيجەسىندە بىرنەشە MQ9 ۇشقىشسىز ۇشاعى، سونداي-اق قارۋ-جاراق پەن بولشەكتەر قويمالارى جويىلدى. بۇل تۋرالى يسلام رەۆوليۋسياسى كۇزەتشىلەر كورپۋسى (يركك) حابارلادى.
«وپەراسيا بارىسىندا زىمىراندار مەن ۇشقىشسىز ۇشاقتاردى قولدانۋ ارقىلى باحرەيندەگى شەيح يسا بازاسىندا جاۋ كەمەلەرى مەن ۇشاقتارىنا ارنالعان بىرنەشە قارۋ-جاراق پەن بولشەكتەر قويماسى جويىلدى. سونداي-اق كۋۆەيتتەگى ءالي اس-سالەم بازاسىندا جاۋ MQ9 ۇشقىشسىز ۇشاقتارى ورنالاسقان الاڭعا شابۋىل جاسالىپ، بىرنەشە ۇشقىشسىز ۇشاق جويىلىپ، زاقىمداندى»، – دەلىنگەن يركك مالىمدەمەسىندە.
يران اقش-تىڭ تاياۋ شىعىستاعى ز ۇلىمدىقتارى اياقتالمايىنشا، ايماقتان ءبىر تامشى مۇناي دا شىعارىلمايتىنىن اتاپ ءوتتى. بۇعان دەيىن اقش پرەزيدەنتى دونالد ترامپ كونگرەستى ەلىنىڭ يرانمەن تاعى دا سوعىس جاعدايىندا ەكەنى تۋرالى رەسمي تۇردە حاباردار ەتكەن بولاتىن.