تەگەران ۆاشينگتونعا جاڭا سوققىلار بولعان جاعدايدا شەشۋشى جاۋاپ قايتاراتىنىن ەسكەرتتى: ەگەر امەريكان اسكەرى يراننىڭ ەكى-ۇش نىساناسىن سوققىعا جىقسا، يران اقش-تىڭ 20 نىساناسىنا سوققى بەرەدى. بۇل تۋرالى يسلام رەۆوليۋسياسى ساقشىلارى كورپۋسىنىڭ (يرسك) رەسمي وكىلى حوسەين موحەبي مالىمدەدى، دەپ حابارلايدى infohub.kz سايتى.
ريا نوۆوستي Fars اگەنتتىگىنە سىلتەمە جاساپ حابارلاعانداي، يران نىسانالارىنا ءاربىر شابۋىلدان كەيىن تەگەران جاۋاپ سوققىلارى ءۇشىن اقش-تىڭ 10 نىساناسىن قاراستىرادى. «ەگەر جاۋ ءبىزدىڭ 2-3 نىسانامىزدى سوققىعا جىقسا، ءبىز 20 نىساناعا (اقش — رەد.) شەشۋشى جاۋاپ بەرەمىز»، — دەپ اتاپ ءوتتى موحەبي.
يرسك وكىلى قاقتىعىستى رەتتەۋ شارتتارىن دا اتادى: اقش اسكەري ارەكەتتەردى تولىق توقتاتۋى، جاڭا قاۋىپ-قاتەرلەردەن باس تارتۋى، يراننىڭ قاتىرىلعان 24 ملرد دوللار اكتيۆتەرىن بوساتۋى، يەمەن بلوكاداسىن الىپ تاستاۋى جانە يراننىڭ يادرولىق جانە زىمىراندىق باعدارلامالارىنا ارالاسپاۋى كەرەك. سونىمەن قاتار، تەگەران يزرايل اسكەرلەرىن ليۆاننان شىعارۋدى تالاپ ەتەدى.
بۇعان دەيىن اقش قارۋلى كۇشتەرىنىڭ ورتالىق قولباسشىلىعى (CENTCOM) يراننىڭ بەس مۇناي تانكەرىن جويعانىن حابارلاپ، ءتيىستى بەينەجازبانى جاريالاعان ەدى. جاۋاپ رەتىندە يرسك ورمۋز بۇعازىنداعى 20 كەمەگە سوققى جاسالعانىن مالىمدەپ، مۇنى اقش شابۋىلىنا رەاكسيا دەپ اتادى.