تەگەران بۇۇ باس حاتشىسى انتونيۋ گۋتەرريشتىڭ سوعىستاردىڭ الدىن الۋ تۋرالى مالىمدەمەسىن سىنعا الىپ، ونى ءىرى دەرجاۆالاردىڭ قياناتتارىن اقتاۋ دەپ اتادى، دەپ حابارلايدى infohub.kz.
يران سىرتقى ىستەر مينيسترلىگىنىڭ رەسمي وكىلى يسمايل باگاي گۋتەرريشتىڭ Financial Times گازەتىنە بەرگەن سۇحباتىنا قاتىستى پىكىر ءبىلدىردى. وندا گۋتەرريش بۇۇ-نىڭ سەكسەن جىلدىق تاريحىنداعى ەڭ ۇلكەن جەتىستىگى «ءىرى دەرجاۆالار اراسىنداعى سوعىستىڭ الدىن الۋ» ەكەنىن ايتقان ەدى.
باگاي مۇنداي مالىمدەمە بۇۇ جارعىسىنىڭ 2(4)-بابىن دوكتريناعا اينالدىرىپ، «بۇۇ مۇشەلەرىنىڭ باسىم كوپشىلىگىن ەلەۋسىز ەتىپ، كەز كەلگەن سوعىستى اقتايدى، جارعىنىڭ نەگىزگى قاعيداتتارى مەن ماقساتتارىنا نۇقسان كەلتىرەدى جانە ودان دا سوراقىسى، وزدەرىن «ءىرى دەرجاۆالار» دەپ اتايتىنداردىڭ باسقالارعا جاساعان قياناتتارىن اقتايدى» دەپ اتاپ ءوتتى.
ونىڭ ايتۋىنشا، مۇنداي كوزقاراس كورەياداعى، ۆەتنامداعى، كونگوداعى، يراكتاعى، اۋعانستانداعى، يەمەندەگى، سۋدانداعى جانە گازاداعى سوعىستار مەن قياناتتاردى تابىس دەپ سانايدى. يران ءسىم وكىلى سونداي-اق باس حاتشىنىڭ وكىلەتتىگى اياقتالۋىنا بىرنەشە اي قالعاندا مۇنداي حابارلامانىڭ ورىندىلىعىنا كۇمان كەلتىردى.