يراننىڭ قازاقستانداعى ەلشىسى ءالي اكبار دجوۋكار ءباسپاسوز ءماسليحاتىندا تاياۋ شىعىستاعى اسكەري جاعدايلارعا بايلانىستى قازاقستان مەن ورتالىق ازياعا تىكەلەي ءقاۋىپ جوق ەكەنىن مالىمدەدى. دەگەنمەن، ەلشى بولاشاقتا يرانداعى تۇراقسىزدىق ايماققا قاتەر ءتوندىرۋى ىقتيمال ەكەنىن ەسكەرتتى.
بۇل تۋرالى Infohub.kz اقپارات اگەنتتىگى حابارلايدى.
بولاشاقتاعى ءقاۋىپ
جۋرناليستەردىڭ «سوعىس سالدارى قازاقستان شەكاراسىنا دەيىن جەتۋى مۇمكىن بە؟» دەگەن سۇراعىنا ەلشى بىلاي دەپ جاۋاپ بەردى: «قازاقستان ءۇشىن ەشقانداي ءقاۋىپ جوق. تەك بولاشاقتا يراندا تۇراقسىزدىق نەمەسە جاپپاي تارتىپسىزدىك ورناسا، ورتالىق ازيا ايماعى ءۇشىن بەلگىلى ءبىر ءقاۋىپ تۋىنداۋى مۇمكىن. ونداي جاعدايدا تاياۋ شىعىستان ەكسترەميستەر مەن تەرروريستەردىڭ ەنۋ ءقاۋپى پايدا بولۋى ىقتيمال»، - دەدى ءالي اكبار دجوۋكار.
كاسپي تەڭىزىندەگى قاۋىپسىزدىك
سونداي-اق، ب ا ق وكىلدەرى كاسپي تەڭىزىندەگى كەمە قاتىناسىنىڭ قاۋىپسىزدىگى تۋرالى دا سۇراق قويعان. ەلشىنىڭ ايتۋىنشا، كاسپيدەگى قاۋىپسىزدىككە ەڭ الدىمەن جاعالاۋداعى مەملەكەتتەردىڭ وزدەرى جاۋاپتى.
ەسكە سالا كەتەيىك، 28 اقپاندا اقش پەن يزرايل يرانعا قارسى اسكەري وپەراسيا باستاعان بولاتىن. سوڭعى مالىمەتتەرگە سايكەس، شابۋىلدار سالدارىنان يراندا كەمىندە 1300 ادام قازا تاپتى.