يران ارنايى قىزمەتتەرى فرانسيا ەلشىلىگىنىڭ ەكى قىزمەتكەرىن ۇستادى. بۇل تۋرالى فرانسيانىڭ سىرتقى ىستەر ءمينيسترى جان-نوەل باررو الەۋمەتتىك جەلى X-تە مالىمدەدى، دەپ حابارلايدى infohub.kz.
«ولاردى نەگىزسىز بىرنەشە ساعات بويى ۇستاپ، جاۋاپ الدى، بىرەۋىن دورەكى قارىم-قاتىناسقا ۇشىراتتى. اقىرىندا ولار ەلشىلىككە قايتا ورالدى، ءقازىر ءقاۋىپسىز جەردە»، — دەپ جازدى ءسىم باسشىسى. باررو الداعى ساعاتتاردا ديپلوماتتار فرانسياعا قايتاتىنىن ايتىپ، بولعان وقيعانى «قورقىتۋ ارەكەتى» جانە «ديپلوماتتىق يممۋنيتەتتى بۇزۋ» دەپ اتادى. ونىڭ ايتۋىنشا، ۇستالعاندار يراندا ازاماتتىق قوعامدى قولداۋ بويىنشا فرانسۋز باعدارلامالارىن ىسكە اسىرۋمەن اينالىسقان.