يران كۋۆەيت پەن باحرەيندەگى اقش اسكەري نىساندارىنا سوققى بەرگەنىن مالىمدەدى، دەپ حابارلايدى infohub.kz سايتى.
يراننىڭ يسلام رەۆوليۋسياسى ساقشىلار كورپۋسى (كسير) كۋۆەيتتەگى مينا-ابداللا اۋدانىندا ورنالاسقان اقش قارۋلى كۇشتەرىنىڭ ماتەريالدىق-تەحنيكالىق قامتاماسىز ەتۋ ورتالىعىنا سوققى بەرىلگەنىن جاريالادى. بۇل تۋرالى يراننىڭ مەملەكەتتىك تەلەراديوكومپانياسى IRIB حابارلادى.
سونىمەن قاتار، يراندىق تاراپ باحرەيندەگى اقش اسكەري-تەڭىز كۇشتەرىنىڭ بەسىنشى فلوتىنىڭ باسقارۋ ورتالىعى مەن اسكەري قويمالارىنا شابۋىل جاسالعانىن مالىمدەدى. ولاردىڭ ايتۋىنشا، بۇل سوققى «ناسر-2» وپەراسياسىنىڭ ءتورتىنشى كەزەڭى اياسىندا جاسالعان.
بۇعان دەيىن اقش يران اۋماعىنا جاڭا اۋە سوققى جاساپ، تەگەرانمەن كەلىسسوزدەردەگى ۇستانىمىن كۇشەيتۋ ماقساتىندا يراننىڭ تەڭىز پورتتارىنا قاتىستى بلوكادانى قايتا ەنگىزگەن بولاتىن.
سونىمەن قاتار، اقش پرەزيدەنتى دونالد ترامپ يرانعا قاتاڭ ەسكەرتۋ جاساپ، كەلىسىم جاساسۋعا شاقىردى. «كەلىسىمگە كەلگەندەرىڭىز دۇرىس بولادى. ايتپەسە، ەلدەرىڭىزدەن ەشتەڭە قالمايدى، تۇرعىندارىڭىز دا وپات بولادى»، — دەگەن بولاتىن اقش پرەزيدەنتى.