يران پرەزيدەنتى ماسۋد پەزەشكيان تەگەران ءتيىستى ۇسىنىستى قابىلداعان سوڭ ورمۋز بۇعازىن اشۋعا جانە ەلدەگى يادرولىق نىساندارعا بۇۇ ينسپەكتورلارىن جىبەرۋگە دايىن ەكەنىن مالىمدەدى، دەپ حابارلايدى infohub.kz سايتى.
يران كوشباسشىسىنىڭ ايتۋىنشا، ەگەر امەريكا قۇراما شتاتتارى يراننىڭ ورمۋز بۇعازى جونىندەگى ۇسىنىسىن قابىلداسا، تەگەران قول جەتكىزىلگەن بارلىق ۋاعدالاستىقتى ۇستانادى.
«ءبىز كەلىسەتىن نارسەنىڭ ءبارىن ۇستانامىز»، — دەدى پەزەشكيان CBS News ارناسىنا بەرگەن سۇحباتىندا.
دونالد ترامپپەن ىقتيمال كەزدەسۋ تۋرالى سۇراققا جاۋاپ بەرگەن يران پرەزيدەنتى ەكى ەل اراسىنداعى سەنىمسىزدىككە سىلتەمە جاسادى.
«ولار كۇن سايىن بىزگە قارسى سانكسيالاردى كۇشەيتىپ جاتىر. كۇن سايىن بىزگە ءقاۋىپ توندىرەدى. كۇن سايىن بىزگە سوققى جاسايدى. ال وزدەرى جازعان نارسەنى ۇستانبايدى»، — دەدى ول.
پەزەشكيان سونداي-اق يراننىڭ يادرولىق نىسانداردى تەكسەرۋ ءۇشىن بۇۇ ينسپەكتورلارىن جىبەرۋگە دايىن ەكەنىن راستادى.
«ەگەر ولار كەلىپ تەكسەرۋ جۇرگىزگىسى كەلسە، بۇل ماسەلە بويىنشا كەلىسسوزدەر بارىسىندا ۋاعدالاستىققا قول جەتكىزە الامىز»، — دەدى پرەزيدەنت.
سونىمەن قاتار ول يران يادرولىق قارۋ جاساۋعا ۇمتىلمايتىنىن، ونى ءدىني تۇرعىدان تىيىم سالىنعان نارسە دەپ اتاعانىن اتاپ ءوتتى.
«يادرولىق قارۋ جاساۋ — حارام»، — دەدى پەزەشكيان جانە ەلدەگى جەكەلەگەن وكىلدەر وسى جولعا تۇسكىسى كەلسە دە، ءدىني نورمالار بۇعان جول بەرمەيتىنىن قوستى.
بۇعان دەيىن يران دەلدالدار ارقىلى ترامپ اكىمشىلىگىنە ۆاشينگتونمەن ۋاعدالاسقاننان كەيىن جەتى كۇن ىشىندە ورمۋز بۇعازىن اشۋدى ۇسىنعانى حابارلانعان بولاتىن.