تەگەران پارسى شىعاناعى ەلدەرىنەن اقش پرەزيدەنتى دونالد ترامپتى يسلام رەسپۋبليكاسىنا جاڭا سوققىلار جاساۋدان باس تارتۋعا كوندىرۋدى تالاپ ەتتى. ايتپەسە، يران ۆاشينگتوننىڭ ايماقتاعى جاقىن وداقتاستارىنىڭ مۇناي، ەنەرگەتيكا جانە كولىك ينفراقۇرىلىمىنا شابۋىل جاسايمىز دەپ قورقىتتى، دەپ حابارلايدى infohub.kz سايتى.
Reuters اگەنتتىگىنىڭ دەرەگىنشە، بۇل ەسكەرتۋ ترامپ 28 شىلدەدە يراننىڭ ەنەرگەتيكالىق نىساندارى مەن باسقا دا ينفراقۇرىلىمىنا سوققى بەرۋ ءقاۋپىن ايتقاننان كەيىن ءبىرقاتار ديپلوماتيالىق بايلانىستار بارىسىندا جەتكىزىلگەن.
Reuters دەرەككوزدەرىنىڭ حابارلاۋىنشا، يران سىرتقى ىستەر ءمينيسترى ابباس اراگچي ساۋد ارابياسى، كاتار جانە تۇركيا ارىپتەستەرىمەن، سونداي-اق پاكىستان ارمياسىنىڭ باس قولباسشىسىمەن كەلىسسوزدەر جۇرگىزگەن. بارلىق اڭگىمەدەگى باستى مەسسەدج ءبىر بولدى: اقش وداقتاستارى ۆاشينگتونعا ىقپالىن پايدالانىپ، ترامپتى جاڭا اسكەري وپەراسيادان باس تارتۋعا كوندىرۋى كەرەك.
«ءبىز جاۋاپ بەرۋگە دايىنبىز، ءبىراق ديپلوماتيالىق شەشىم — ايماقتا ودان ءارى ەسكالاسيا مەن قيراۋدى بولدىرماۋدىڭ ەڭ جاقسى جولى»، — دەپ ايماقتاعى جوعارى لاۋازىمدى ديپلوماتتاردىڭ ءبىرى تەگەران پوزيسياسىنىڭ مازمۇنىن جەتكىزدى.
اگەنتتىك دەرەككوزدەرىنىڭ ايتۋىنشا، ەگەر اقش يرانعا قايتا شابۋىل جاساسا، جاۋاپ پارسى شىعاناعى ەلدەرىنىڭ مۇناي كەن ورىندارىنا، مۇناي وڭدەۋ زاۋىتتارىنا، ەلەكتر جەلىلەرىنە، سۋمەن جابدىقتاۋ نىساندارىنا، كولىك ينفراقۇرىلىمىنا جانە باسقا دا ستراتەگيالىق نىساندارىنا باعىتتالۋى مۇمكىن.
وسى ەسكەرتۋلەردەن كەيىن ساۋد ارابياسىنىڭ تاق مۇراگەرى مۇحاممەد بين سالمان، Reuters دەرەكتەرى بويىنشا، دونالد ترامپقا حابارلاسىپ، ونى جاڭا اسكەري وپەراسيادان باس تارتىپ، كەلىسسوزدەر مەن اتىستى توقتاتۋعا شاقىرعان.
كاتار، ومان جانە ساۋد ارابياسى دا ۆاشينگتون مەن تەگەران اراسىنداعى ديالوگتى قايتا جانداندىرۋدى قولدادى.
ال 2 تامىزدا ترامپ، ەگەر تەز ارادا كەلىسىمگە قول جەتكىزىلسە، يرانعا جوسپارلانعان سوققىنى بولدىرماۋعا دايىن ەكەنىن مالىمدەدى. ال كەشە اقش پرەزيدەنتى ورمۋز بۇعازىن سەيسەنبىگە دەيىن تولىق اشۋعا ۋادە بەردى.