2025 جىلعى جەلتوقساندا «دامۋ» كاسىپكەرلىكتى دامىتۋ قورى ىسكە قوسقان شاعىن بيزنەستى قولداۋدىڭ «ىسكەر ايماق» ءبىرىڭعاي باعدارلاماسى 21 ملرد تەڭگەدەن استام سوماعا 300-دەن استام جوبانى ماقۇلدادى، دەپ حابارلايدى infohub.kz سايتى.
2026 جىلى قارجىلاندىرۋ كولەمىن 20 ەسەگە جۋىق ۇلعايتىپ، 400 ملرد تەڭگەگە جەتكىزۋ جوسپارلانۋدا، بۇل 5 مىڭعا جۋىق جوبانى قولداۋعا مۇمكىندىك بەرەدى.
باعدارلاما ميكرو جانە شاعىن بيزنەسكە، ونىڭ ىشىندە اۋىلدىق جەرلەر مەن مونوكالالارداعى كاسىپكەرلەرگە باعىتتالعان. جوبانىڭ باستى ەرەكشەلىگى – وڭىرلىك ءتاسىل: نەسيەلەۋدىڭ باسىم باعىتتارىن اكىمدىكتەر «اتامەكەن» ۇلتتىق كاسىپكەرلەر پالاتاسىمەن بىرلەسىپ، ءار وبلىس ەكونوميكاسىنىڭ ەرەكشەلىگىن ەسكەرە وتىرىپ ايقىندايدى.
قوردىڭ مالىمەتىنشە، باعدارلاما ءارتۇرلى سالالارداعى جوبالاردى قولداعان. مىسالى، جامبىل وبلىسىندا قارجىلاندىرۋدى 20 جىلدان استام ۋاقىت بويى قوي تەرىسىن وڭدەپ، ءۇلبىر بۇيىمدارىن شىعارىپ كەلە جاتقان كومپانيا الدى. كاسىپورىن جىل سايىن شامامەن 46 مىڭ تەرىنى وڭدەيدى، قتج، ءىىم جانە قورعانىس مينيسترلىگى ءۇشىن 20 مىڭعا جۋىق ءۇلبىر بۇيىمىن شىعارادى، سونداي-اق ءونىمىن رەسەي مەن وزبەكستانعا ەكسپورتتايدى.
قىزىلوردا وبلىسىندا جەكە كاسىپكەر شيكى كۇرىش ساتىپ الۋعا 110 ملن تەڭگە تارتتى. نەسيە 22% مولشەرلەمەمەن بەرىلگەن، ونىڭ 8،8 پايىزدىق تارماعىن مەملەكەت سۋبسيديالايدى، سوندىقتان كاسىپكەر ءۇشىن تۇپكىلىكتى مولشەرلەمە جىلدىق 13،2% قۇرايدى. كاسىپورىن تاۋلىگىنە 150 تونناعا دەيىن كۇرىش وڭدەيدى، ءونىمىن قىرعىزستانعا، رەسەيگە جانە اۋعانستانعا ەكسپورتتايدى.
سولتۇستىك قازاقستان وبلىسىندا مەديسينالىق جابدىق شىعارۋشى كاسىپورىن قوسالقى بولشەكتەر ساتىپ الۋ ءۇشىن ءۇش جىل مەرزىمگە 100 ملن تەڭگە نەسيە الدى. بۇل ءونىم شىعارۋ كولەمىن جىلىنا 5 مىڭنان 10 مىڭ داناعا دەيىن ۇلعايتۋعا جانە بەس جاڭا جۇمىس ورنىن اشۋعا مۇمكىندىك بەرەدى.