يسلام دامۋ بانكى قازاقستانداعى سۋ شارۋاشىلىعى جوبالارىن ىسكە اسىرۋعا گرانتتار مەن قارجى بولەدى، دەپ حابارلايدى infohub.kz.
قازاقستان رەسپۋبليكاسى پرەمەر-مينيسترىنىڭ ورىنباسارى – ۇلتتىق ەكونوميكا ءمينيسترى نۇرلان بايبازاروۆ ساۋد ارابياسىنا جۇمىس ساپارىمەن باردى. وندا يسلام دامۋ بانكىنىڭ (يدب) جىلدىق وتىرىسى وتۋدە.
قازاقستاننان باسقارۋشى رەتىندە نۇرلان بايبازاروۆ يدب توبىنىڭ پرەزيدەنتى مۇحامماد ال-دجاسسەر جانە يسلام ينۆەستيسيالار مەن ەكسپورتتىق نەسيەلەردى ساقتاندىرۋ كورپوراسياسىنىڭ (ICIEC) باس اتقارۋشى ديرەكتورى ءۇساما قايسيمەن كەزدەسۋ وتكىزدى.
ااا دەڭگەيىندەگى رەيتينگى بار يسلام دامۋ بانكى الەمدەگى ەڭ بەلسەندى كوپجاقتى دامۋ بانكتەرىنىڭ ءبىرى جانە يسلام قارجىسى سالاسىنداعى كوشباسشى. ول قاتىسۋشى ەلدەردىڭ الەۋمەتتىك جانە ەكونوميكالىق دامۋىنا ۇلەس قوسادى.
مۇحامماد ال-دجاسسەرمەن كەزدەسۋدىڭ باستى تاقىرىبى قازاقستاننىڭ سۋ شارۋاشىلىعى ينفراقۇرىلىمىن جاڭعىرتۋ جوبالارىن قارجىلاندىرۋ بولدى. بيىلعى رەكوردتىق تاسقىن سۋلارعا بايلانىستى بۇل باعىت ۇكىمەتتىڭ باسىم باعىتتارىنىڭ ءبىرى.
ەلدىڭ سۋ رەسۋرستارى الەۋەتىن ساقتاۋ جانە قاۋىپسىزدىكتى قامتاماسىز ەتۋ ماقساتىندا ءبىرقاتار شۇعىل شارالار قاراستىرىلۋدا. ونىڭ ىشىندە سۋ قويمالارىن، گيدروتەحنيكالىق قۇرىلىستاردى جانە سۋارۋ جۇيەلەرىن سالۋ مەن قايتا جاڭارتۋ، سونداي-اق سيفرلاندىرۋ جانە سۋ ۇنەمدەۋ تەحنولوگيالارىن ەنگىزۋ بار.
كەزدەسۋ قورىتىندىسى بويىنشا يدب توبىنىڭ قازاقستان رەسپۋبليكاسىنىڭ سۋ جوبالارىنا اۋقىمدى ينۆەستيسيالار جىبەرۋى، سونداي-اق ءتيىستى تەحنيكالىق قۇجاتتامانى دايىنداۋعا گرانتتار ءبولۋى تۋرالى كەلىسىمگە قول جەتكىزىلدى. العاشقى ترانشتار بيىلعى جىلى كەلىپ تۇسەدى.
ICIEC-پەن كەلىسسوزدەر اياسىندا «بايتەرەك» حولدينگىنىڭ ۇيىمدارى – KazakhExport ەكسپورتتىق-نەسيەلىك اگەنتتىگى جانە قازاقستان دامۋ بانكىمەن قايتا ساقتاندىرۋ، ساقتاندىرۋ جانە كەپىلدىك بەرۋ بويىنشا ىنتىماقتاستىق تۋرالى كەلىسىمدەرگە قول جەتكىزىلدى. كومپانيالار كولىك ينفراقۇرىلىمى، ساۋدانى قارجىلاندىرۋ جانە ينۆەستيسيالاردى ساقتاندىرۋ سالاسىنداعى بىرلەسكەن جوبالارعا مۇددەلى.
ەسكە سالا كەتەيىك، قازاقستان يسلام دامۋ بانكىنىڭ مۇشەسى 1995 جىلى بولدى. وسى ۋاقىت ىشىندە يدب توبىنىڭ قاتىسۋىمەن رەسپۋبليكادا جالپى سوماسى 1،8 ميلليارد دوللارعا جۋىق 67 جوبا ىسكە اسىرىلدى.