قازاقستاندىق مەرگەن يسلام ساتپايەۆ جاپونيادا ءوتىپ جاتقان 2026 جىلعى ازيا ويىندارىندا وق اتۋدان ەل قورجىنىنا العاشقى مەدال سالدى، دەپ حابارلايدى infohub.kz سايتى.
28 جاستاعى سپورتشى 50 مەتردەن كىشى كاليبرلى ۆينتوۆكادان ءۇش قالىپتا — جاتپا، تىزەرلەپ جانە تۇرىپ اتۋدان ءۇشىنشى ورىن الدى. فينال قورىتىندىسى بويىنشا ونىڭ ەنشىسىندە 348،3 ۇپاي بار.
قازاقستاندىقتان جوعارى تەك قىتايدىڭ ەكى وكىلى تۇردى. جەڭىستى وسى سايىستىڭ قازىرگى وليمپيادا چەمپيونى ليۋ يۋكۋن 360،5 ۇپايمەن ازيا ويىندارىنىڭ رەكوردىن جاڭارتىپ باستادى. كۇمىس چجان چانحۋنعا (360،2) بۇيىردى.
قازاقستاننىڭ تاعى ەكى مەرگەنى وسى باعدارلامانىڭ فينالىنا وتە المادى. كونستانتين مالينوۆسكي ىرىكتەۋ كەزەڭىن 13-ورىنمەن اياقتاسا، نيكيتا شاحتورين 20-ورىندا تۇراقتادى. كوماندالىق ەسەپتە ءۇش قازاقستاندىق مەرگەن بەسىنشى ورىنعا جايعاستى.
ساتپايەۆ ءۇشىن بۇل — ازيا ويىندارىنداعى ەكىنشى مەدالى. 2022 جىلى حانچجوۋدا وتكەن ويىنداردا ول الەكساندرا لە ەكەۋى 10 مەتردەن پنەۆماتيكالىق ۆينتوۆكادان اتۋدان ارالاس دۋەتتەر تۋرنيرىندە قولا جۇلدە العان بولاتىن. ءدال وسى سايىستا جۇپ پاريجدەگى 2024 جىلعى وليمپيادادا دا قولا مەدال جەڭىپ الدى.