يسپانيادا تۇرعىن ءۇي داعدارىسىنىڭ سيمۆولىنا اينالعان مۇگەدەك زەينەتكەر ماريكارمەن اباسكال مادريدتەگى ۇيىنە قايتا ورالا الادى. بۇل تۋرالى ونىڭ ادۆوكاتى بەاتريس دۋرو مالىمدەدى، دەپ حابارلايدى infohub.kz سايتى.
87 جاستاعى ايەل 23 قىركۇيەكتە 70 جىلدان استام تۇرعان پاتەرىنەن زورلىقپەن شىعارىلىپ، نوسيلكامەن الىپ كەتىلگەن ەدى. وقيعادان كەيىن ول اۋرۋحاناعا جات قىزىلدى.
بۇل ارەكەت بۇكىل يسپانيادا نارازىلىق تۋدىردى. پرەمەر-مينيستر پەدرو سانچەس سەيسەنبىدەگى ۇكىمەت وتىرىسىندا تۇرعىن ءۇي ماسەلەسى بويىنشا جەڭىلدىك شارالارىن ۇسىناتىنىن ۋادە ەتتى.
اباسكالدىڭ ادۆوكاتى بەاتريس دۋرو ءباسپاسوز ءماسليحاتىندا «ەكى تاراپ تا ىزگى نيەت تانىتقانىن» ايتىپ، جاڭا كەلىسىمشارت بويىنشا ول بۇرىنعىعا جۋىق جالداۋ اقىسىن تولەيتىنىن، بۇل باعانىڭ كۇرت ءوسۋىن بولدىرمايتىنىن جەتكىزدى.
اباسكالدىڭ اكەسى 1956 جىلى پاتەردى جالعا العان، اتا-اناسى قايتىس بولعان سوڭ ول جالعا الۋشى رەتىندە قالعان. سول كەزدە جالداۋ اقىسىنا شەكتەۋ قويىلعان بولاتىن.
2018 جىلى ءۇيدى ساتىپ العان Urbagestión ينۆەستيسيالىق كومپانياسى جالداۋ اقىسىن ايىنا 500 ەۋرودان (428 فۋنت؛ 572 دوللار) 2 650 ەۋروعا (2 280 فۋنت؛ 3 020 دوللار) كوتەردى. كەيىن كومپانيا ونى 1 650 ەۋروعا تومەندەتۋدى ۇسىندى، ءبىراق ول ايلىق زەينەتاقىسى 1 350 ەۋرو بولعاندىقتان بۇل سومانى دا تولەي المادى.
ونى شىعارۋعا بۇعان دەيىن ءۇش رەت سوت تىيىم سالعان.
ونىڭ وقيعاسى بۇكىل ەلدە نارازىلىق تۋدىرىپ، سەنبىدە ونداعان مىڭ ادام يسپانيا استاناسىندا شەرۋگە شىعىپ، شىعارۋعا قارسىلىق ءبىلدىردى جانە تۇرعىن ءۇي تاپشىلىعى مەن جالداۋ باعاسىنىڭ قىمباتتاۋى جاعدايىندا جالعا الۋشىلاردى قورعاۋدى كۇشەيتۋدى تالاپ ەتتى.
دۋرو ءالى قول قويىلماعان كەلىسىم «الەۋمەتتىك جۇمىلدىرۋدىڭ ناتيجەسى» ەكەنىن ايتتى. ول سونداي-اق شارشاۋدان ەمدەلىپ جاتقان اباسكال ءوزىن جاقسى سەزىنگەندە كەلىسىمگە قول قوياتىنىن قوستى.
قولداۋشىلار مۇنى جەڭىس دەپ اتادى، ءبىراق وسىنداي شىعارۋلاردىڭ الدىن الۋ جانە قولجەتىمدى تۇرعىن ۇيمەن قامتاماسىز ەتۋ ءۇشىن كۇرەستى جالعاستىراتىنىن ۋادە ەتتى.
يسپانيا ۇلتتىق بانكىنىڭ باعالاۋىنشا، سۇرانىس پەن جاڭا قۇرىلىس اراسىنداعى الشاقتىققا بايلانىستى ەلدە 700 مىڭ تۇرعىن ءۇي جەتىسپەيدى.
پارلامەنتتە كوپشىلىگى جوق پەدرو سانچەستىڭ سوسياليستىك پارتياسى قوعامدىق نارازىلىقتى باسۋ ءۇشىن زاڭ قابىلداۋدى ءۇمىت ەتەدى.