ءساۋىر ايىندا ستامبۇلدا قازاقستان ازاماتى يسمايلوۆ اتىلدى. بۇل قاستاندىق قازاقستان، تۇركيا جانە گرۋزيا قۇقىق قورعاۋ ورگاندارى جۇرگىزگەن اۋقىمدى حالىقارالىق وپەراسيانىڭ باستاماسى بولدى، دەپ حابارلايدى infohub.kz.
ءۇش ەلدىڭ ءوزارا ءىس-قيمىلىنىڭ ارقاسىندا قىلمىس تەز ارادا اشىلدى. كۇدىكتى ەكى ورىنداۋشى ۇستالدى. تەرگەۋ قىلمىستىڭ سەبەبىن، سونداي-اق ۇيىمداستىرۋشى مەن تاپسىرىس بەرۋشىنى انىقتادى. ءىىم دەرەگىنشە، ولار ترانسۇلتتىق قىلمىستىق ورتانىڭ وكىلدەرى جانە حالىقارالىق ىزدەۋدە ءجۇر.
تەرگەۋ بارىسىندا الىنعان اقپارات ۇقك-مەن بىرلەسىپ، قازاقستان اۋماعىندا وسى توپتىڭ باسقا دا اۋىر قىلمىستارىن اشۋعا مۇمكىندىك بەردى. توپتى اقش-تا ءجۋرناليستى ولتىرمەك بولعانى ءۇشىن سوتتالعان قىلمىستىق بەدەل باسقارعان. الماتىدا پوليسيا قىزمەتكەرلەرى توپتىڭ كۇدىكتى ءبىر كىللەرىن ۇستادى. تەرگەۋ نۇسقاسى بويىنشا، ول 2025 جىلدىڭ تامىزىندا قالا تۇرعىنىنا قاستاندىق جاساۋعا قاتىسى بار. قارۋ – تاپانشا – تاركىلەندى. تەرگەۋ اياقتالىپ، قىلمىستىق ءىس سوتقا جولداندى.
ءىىم ۇيىمداسقان قىلمىسقا قارسى كۇرەس دەپارتامەنتىنىڭ وكىلى قۋاندىق الپىستىڭ ايتۋىنشا، ۇستاۋلار قازاقستان، تۇركيا جانە گرۋزيا اۋماعىندا كەزەڭ-كەزەڭمەن جۇرگىزىلدى. «ءىىم گرۋزيا جانە تۇركيا ارىپتەستەرىمەن بىرلەسىپ، ءۇش مەملەكەت اۋماعىندا ترانسۇلتتىق ۇيىمداسقان قىلمىستىق توپ مۇشەلەرىن ۇستاۋ بويىنشا كەزەڭ-كەزەڭمەن ارنايى وپەراسيا جۇرگىزدى. الماتى قالاسىندا اتالعان قىلمىستىق قۇرىلىمنىڭ مۇشەلەرىنەن قۇرالعان ءبىر توپ ادام ۇستالدى، ولارعا قارۋ قولدانىلعان بىرنەشە شابۋىل فاكتىلەرىنە قاتىستىلىق تاعىلادى»، – دەدى ول.
تەرگەۋ نۇسقاسى بويىنشا، قىلمىستىق توپتىڭ ماقساتى – قىلمىستىق يدەولوگيا ەلەمەنتتەرىن پايدالانا وتىرىپ، دياسپورالىق قاۋىمداستىقتاردىڭ جەكەلەگەن وكىلدەرىنىڭ بيزنەسىنە قىلمىستىق ىقپال ەتۋ بولعان. سونىمەن قاتار، گرۋزيادا ءىىم دەرەگىنشە ترانسۇلتتىق قىلمىستىق قۇرىلىمدارمەن بايلانىستى جانە ءبىرقاتار اۋىر قىلمىستارعا قاتىسى بار كۇدىكتىلەر ۇستالدى. ءىىم بارلىق انىقتالعان ەپيزودتار بويىنشا دالەلدەمەلەر جيناۋدى جالعاستىرىپ، قىلمىستىق توپتىڭ باسقا دا مۇشەلەرىن انىقتاۋدا. سونداي-اق ۇيىمداستىرۋشىنى جاۋاپكەرشىلىككە تارتۋ بويىنشا جۇمىس جۇرگىزىلۋدە.