يتاليالىق پوليسەيلەر ەكۆادوردان جەتكىزىلگەن بانان سالىنعان كونتەينەردەن 770 كەلىگە جۋىق كوكايندى تاۋىپ، تاركىلەدى. تەرگەۋشىلەردىڭ باعالاۋىنشا، قارا نارىقتاعى بۇل پارتيانىڭ قۇنى 250 ميلليون ەۋروعا، ياعني شامامەن 290 ميلليون اقش دوللارىنا جەتۋى مۇمكىن، دەپ حابارلايدى infohub.kz.
ەسىرتكىنىڭ ءىرى پارتياسى ۆادو-ليگۋرە پورتىنان تابىلدى. تەكسەرۋ كەزىندە يتاليا قارجى پوليسياسىنىڭ قىزمەتكەرلەرى بانان سالىنعان توڭازىتقىش كونتەينەردىڭ ىشىنەن مۇقيات جاسىرىلعان 650 بۋما زاتتى انىقتادى.
جەدەل ساراپتاما الىنعان زاتتىڭ جوعارى تازالىقتاعى كوكاين ەكەنىن راستادى. بيلىك وكىلدەرىنىڭ مالىمەتىنشە، بۇل وپەراسيا وسى پورتتا سوڭعى جىلدارى جۇرگىزىلگەن ەسىرتكىگە قارسى ەڭ ءىرى شارالاردىڭ ءبىرى بولدى.
تەرگەۋشىلەردىڭ ايتۋىنشا، كونتەينەر وڭتۇستىك امەريكا مەن يتاليا اراسىنداعى ساۋدا باعىتتارىن تالداۋ ناتيجەسىندە انىقتالعان. ۆادو-ليگۋرە پورتى ەۋروپاعا تاۋار جەتكىزۋدىڭ ماڭىزدى نۇكتەلەرىنىڭ ءبىرى سانالادى جانە حالىقارالىق ەسىرتكى كارتەلدەرىنىڭ ۇنەمى نازارىندا.
پوليسيا مۇنداي وپەراسيالار حالىقارالىق ەسىرتكى ساۋداسىنا قارسى اۋقىمدى كۇرەستىڭ ءبىر بولىگى ەكەنىن جانە ەۋروپالىق ەلدەرگە تىيىم سالىنعان زاتتاردى جەتكىزۋگە توسقاۋىل قويۋعا باعىتتالعانىن مالىمدەدى.