ماروككودان سەۋتاعا 60 مىڭعا جۋىق ميگرانتتىڭ اعىلۋىنا بايلانىستى يتاليا يسپانيامەن اۋە جانە تەڭىز شەكاراسىندا شەنگەن كەلىسىمىن ۋاقىتشا توقتاتاتىنىن مالىمدەدى، دەپ حابارلايدى infohub.kz سايتى.
يتاليانىڭ ىشكى ىستەر مينيسترلىگىنىڭ مالىمەتىنشە، بۇل شارا ازاماتتاردىڭ قاۋىپسىزدىگىن قامتاماسىز ەتۋ جانە ەۋروپا شەكاراسىن قورعاۋ ماقساتىندا قابىلدانىپ وتىر. مينيسترلىك يسپانيادان كەلەتىن ءۇشىنشى ەل ازاماتتارىنا «ماقساتتى، ىرىكتەلگەن تەكسەرۋلەر» جۇرگىزەتىنىن حابارلادى. بۇل شارا تەك قاجەتتى ۋاقىتقا عانا ەنگىزىلىپ، جازعى تۋريستىك اعىمعا اسەردى ازايتۋعا تىرىسادى.
يتاليا پرەمەر-مينيسترى دجوردجا مەلوني بۇل قادامدى «توتەنشە شارا» دەپ اتاپ، ونىڭ ۇلتتىق قاۋىپسىزدىكتى قورعاۋ جانە ەلگە ىقتيمال اسەرلەردىڭ الدىن الۋ ءۇشىن قابىلدانعانىن ايتتى. ول سونداي-اق يتاليانىڭ يسپانياعا ەۋروپا وداعىنىڭ سىرتقى شەكارالارىن تولىق باقىلاۋدى قالپىنا كەلتىرۋگە كومەكتەسۋگە دايىن ەكەنىن جەتكىزدى.
بۇعان دەيىن يسپانيا پرەمەر-مينيسترى پەدرو سانچەس سەۋتاداعى جاعدايدى «يسپانيانىڭ اۋماقتىق تۇتاستىعىنا قارسى شابۋىل» دەپ باعالاپ، بۇعان ادام ساۋداگەرلەرىنىڭ جالعان اقپاراتى سەبەپ بولعانىن مالىمدەگەن ەدى. ال يتاليانىڭ سىرتقى ىستەر ءمينيسترى انتونيو تاياني شەنگەن كەلىسىمىن ۋاقىتشا توقتاتۋدى «قاجەتتى تاڭداۋ» دەپ اتاپ، بۇل كەلىسىمدەردە كوزدەلگەن شارا ەكەنىن ايتتى.
ەۋروپالىق كوميسسيانىڭ مالىمەتىنشە، سەۋتاداعى ميگرانتتاردىڭ ەۋروپانىڭ باسقا ەلدەرىنە ءوتۋ مۇمكىندىگى جوق، ويتكەنى سەۋتا شەنگەن ايماعىنا كىرمەيدى. دەگەنمەن، يتاليانىڭ بۇل شەشىمى ەۋروپاداعى ميگراسيالىق داعدارىسقا قاتىستى پىكىرتالاستاردى كۇشەيتتى. كەيبىر ەلدەر يسپانيانى شەنگەننەن شىعارۋدى ۇسىنسا، سلوۆاكيا پرەمەر-مينيسترى روبەرت فيسو بۇل يدەياعا قارسى شىعىپ، يسپانياعا شەكارانى قورعاۋعا كومەكتەسۋگە دايىن ەكەنىن ءبىلدىردى.
يسپانيا بيلىگى جۇما كۇنى تۇسكە تامان ميگرانتتاردىڭ باسىم كوپشىلىگى ماروككوعا ءوز ەركىمەن قايتقانىن حابارلادى. سوڭعى مالىمەتتەر بويىنشا، 48 300-گە جۋىق ادام قايتارىلعان. ال سەۋتاعا كىرۋ كەزىندە كەمىندە 57 ادام قازا تاپقانى بەلگىلى بولدى.