يتاليانىڭ بيتونتو قالاسىنىڭ تۇرعىنى ميلليون ەۋرو ۇتقان لوتەرەيا بيلەتىن تاستاپ، بايلىعىنان ايىرىلا جازدادى. باقىتىنا وراي، جەرگىلىكتى قوقىس شىعارۋ قىزمەتىنىڭ قىزمەتكەرلەرى تونناعا جۋىق قوقىستى سۇرىپتاپ، بيلەتتى تاۋىپ بەردى، دەپ حابارلايدى infohub.kz.
ەر ادام لوتەرەيا بيلەتىن ساتىپ الىپ، دۇكەندە تەكسەرگەن كەزدە «تولەنبەيدى» دەگەن جازۋ كورگەن. ول كومبيناسيا ۇتپادى دەپ ويلاپ، بيلەتتى تاستاعان. الايدا كەيىن تۋىستارى تۇسكەن 2، 4، 8، 19 جانە 51 ساندارى ونىڭ بيلەتىندەگى ساندارمەن سايكەس كەلەتىنىن بايقاعان. ال جازۋ دۇكەننىڭ كاسساسى مۇنداي ۇلكەن ۇتىستى تولەي المايتىنىن عانا بىلدىرگەن.
ول كەزدە ۇيدەگى قوقىس الدەقاشان شىعارىلىپ كەتكەن ەدى. ەر ادام جەرگىلىكتى SANB قوقىس كومپانياسىنا جۇگىنگەن. كاسىپورىن ديرەكتورى قوقىس تيەلگەن كولىكتى توقتاتىپ، ارنايى بازاعا جىبەرۋدى بۇيىرعان. بۇل وقيعا جەكسەنبى كۇنى بولعانى ساتتىلىك، ايتپەسە قوقىس پوليگونعا بىردەن جەتكىزىلەر ەدى.
كومپانيا قىزمەتكەرلەرى ەكى كۇن بويى قوقىستى سۇرىپتاپ، كوپتەگەن زاقىمدالعان چەكتەردىڭ اراسىنان قاجەتتى بيلەتتى تاپقان. ميلليون يەسى ىزدەۋگە كەتكەن بارلىق شىعىندى وتەيتىنىن ايتقان. ال ساتتىلىككە شابىتتانعان قوقىس جيناۋشىلار بيلەتتى تاپسىرعاننان كەيىن سكرەچ-كارتا ساتىپ الىپ، 50 ەۋرو ۇتىپ العان.